Piitsuunerup akiornissaa ataatsimoorullugu suliassaavoq
Inuit Ataqatigiit siunnersuutigaat, ilaqutariinnut meerartalinnut akileraarummut ilanngaat qaffanneqassasoq aammalu 400.000 kr. sinnerlugu isertitallit qaffasinnerusumik akileraartalernissaat.
-Piitsuuneq meeqqallu piitsuunerat akiorniartariaqarpoq, aamma inooriaatsimik kingornussisarneq qaangerniarlugu, taamak Inuit Ataqatigiit siulersuisuuneri Nuummi katersuuteqqammersut meeqqat piitsuussusaat pillugu nalunaarusiamut saqqummiunneqaqqammersumut oqaaseqaateqarlutik oqarput.
Inatsisartut ukiaanerani ataatsimiinnissaannut Inuit Ataqatigiit siunnersuutigaat ilaqutariinnut meerartalinnut akileraarutinut ilanngaatip qaffanneqarnissaa aammalu - kisimiittunut 400.000 kr. aappariinnullu 800.000 kr. sinnerlugit isertitalinnut - akileraatutit qaffanneqassasut. Kingullertuut taaneqartut isertitakinnerpaat ilaqutariilllu meerartallit akileraarutitigut oqilisaaffigineqarnissaannut aningaasalersuutissatut.
- Aningaasaqarnikkut nappertuilluarnerusumik oqimaaqatigiissaarinissaq qulakkeerniassagaanni politikerit atortussat sukumiinerusut aalajangiiniarnerminnut tunngavissatut atorniartariaqarpaat. Meeqqat piitsuussusaat pillugit paasissutissat nutaat ilisimasanut pioreersunut ilaliullugit misissuiffigeqqissaartariaqarput. Inuit Ataqatigiit siunnersuutigaat suliassaq taanna ukiaanerani ataatsimmiinnissami ataatsimiitsitaliamit suligasuartussamit ingerlanneqassasoq, IA-p siulersuisuuneri allapput.