Pilersaarut piareerpoq: Kangilinnguani uuliamik saliineq ukiuni 14-ini sivisussuseqassangatinneqarpoq
Danskit kalaallillu oqartussaat suleqatigiillutik Kangilinnguani sakkutooqarfimmi avatangiisinik saliinissamut pilersaarusiorput.
Kangilinnguani sakkutooqarfimmi saliinermik sulinerup nanginneqarnissaanut pilersaarut maanna piareersimalerpoq.
Danskit illersornissamut ministereqarfia Folketingimi nunarput pillugu ataatsimiititaliamut taama ilisimatitsivoq.
Ilisimatitsissut naapertorlugu sakkutooqarfimmi uuliamik mingutsitsinerup salinneqarnissaanut periusissaq aalajangiunneqarsimavoq, kiisalu suliassaq EU-mi suliariumannittussarsiuunneqassaaq aamma sanaartugassanik suliaqartut 2025-mi sulinermik aallartitsinissaat naatsorsuutigineqarpoq.
Suliassaq tamakkiisoq ukiuni 14-ini sivisussuseqassangatinneqarpoq.
Kalaallit sulisut pingaartinneqartut
Suliniut sapinngisamik kalaallinik sulisoqarnikkut ingerlanneqassasoq, Danmarkimi Ejendomsstyrelsenip (pigisanik aqutsiveqarfiup) tamatuma saniatigut qulakkiissavaa, assersuutigalugu atortulersuinermi aamma nunaateqarnermik ataavartumik ingerlatsinermi, ilisimatitsissummi taama allaqqasoqarpoq.
Danskit kalaallillu oqartussaasa ataatsimoorlutik Naalakkersuisut siulittaasorisimasaata Kim Kielsenip aamma danskit illersornissamut ministererisimasaata Claus Hjorth Frederiksenip akornanni isumaqatigiissut tunuliaqutaralugu pilersaarut 2017-mili suliaraat.
Sakkutooqarfik 2012-mi matuneqaraluarpoq, kisianni Danmarkimi 2017-imi politikkikkut isumaqatigiissuteqartoqarnerata kingorna ammaqqinneqarpoq. Danskit tusagassiorfiat naapertorlugu Kinamiut suliffeqarfiutaata sakkutooqarfiup pisiarinissaanut soqutiginnissimanerata kingorna tamanna pivoq.
Periuseq CO2-mik artukkiinnginnerusoq toqqarneqartoq
Kangilinnguani nakkutilliisut aalajangersimasut marluk pingasulluunniit taamaallaat sulitinneqarput.
Oqartussat ukiumi kingullermi misileraanernik assigiinngitsunik ingerlataqarsimasut aamma uuliamik mingutsitsinerup salinneqarnissaanut periutsimik pitsaanerpaamik nassaarniarluni marloriarluni ataatsimiititsisimasut, illersornissamut ministereqarfimmit ilisimatitsissummi allaqqavoq.
Periutsit marluk toqqarneqarsinnaasimapput, oqartussallu periuseq CO2-mik aniatitsinnginnerusoq toqqarsimavaat, kisianni ataatsimut isigalugu sivisunermik ingerlanneqartussaavoq. Periuseq nunaateqarnermik ingerlatsiveqarnermik taaneqartumik Mestersvigimi angusaqarluartoqarneranik tunngaveqarpoq, Naalakkersuisullu pilersaarut akueraat.
- Arsuup Kangerluanik ilungersunartumik artukkiisoqannginnissaanik aamma Kangilinnguit sakkutooqarfittut atorneqarnissaanik piumasaqaatilimik, Ejendomsstyrelsenip pilersaarutaa tunngaveqarpoq. Aammattaaq Arsuup kangerluanut aniatitsinerup annikillisinneqarnissaa anguniarneqarpoq, mingutsitsinerit takuneqarsinnaasut peerneqassallutik, kiisalu nalinginnaasumik nunami uuliat iliuuseqarfigineqarnissaat.