Pilersaarutaareersutut: Kujataani internetti sapaatiuppat qaminneqassaaq
Kujataani imaani kabelimik aaqqissuussineq aallarteqqinneqalerpoq, sapaatini akunnerini pingasuni imaani kabelip suliarineqarnissaa naatsorsuutigineqarluni
Kujataani immap naqqatigut kabeli kittorarmat upernaaq iluarsaanneqariaraluarpoq iluatsinngitsumilli. Silap unerisimannginnera sikorsuillu pissutaallutik canadamiut umiarsuaat immap naqqatigut kabelinik iluarsaassisartoq sumiiffimmi iluarsaassisinnaasimanngilaq.
Tele-Post maanna nalunaarpoq, kujataani immap naqqatigut kabelip suliarineqarnissaa sapaatiuppat aallartissasoq.
Sapaatip akunnerit pingasut missaanni
- Aaqqissuussineq aallartippat Kujataani Paamiuniit Narsaq Kujallermut innuttaasunut tamanut internetimut attaviit qaminneqassapput. Telefonimik atuinerit tamarmik, tassa telefonimik nalinginnaasumik, angallattakkanut attaveqaat, SMS-ikkut, TV aamma radio atorsinnaajuaannassapput, Tele-Post tusagassiutinut nalunaarummi allappoq.
Aaqqissuussineq ullunik 15-iniit 20-t missaannut sivisussuseqassaaq. Imaani avammut ammaannartumi aaqqissuussinermut sila anorilu apeqqutaassaaq, taamaattumik allanngortoqarsinnaassaaq, sullitagulli SMS aammalu tusagassiuutit aqqutigalugit paasissutissinneqartarumaarput, ilisimatitsissutigineqarpoq.
Akilerneqarsimasut utertinneqarnissaat
Aaqqissuussinerit naammassippata, ullunut internetip qaminngaffigisimasaanut sullitagut aningaasanik utertitsiffigineqassapput.
- Innuttaasunut utertitassat annertussusissaat aalajangersarneqassaaq, imaani kabelip suliarineqarnera naammasseriarpat. Sullitat aningaasanik utertitsiffigineqartussat SMS-ikkut paasitinneqassapput.
Imaani kabelip aaqqissuunneqarnerata nalaani sakkortusaavimmi tapertatut atorneqartussami piginnaasaq killilerujussuussaaq, tamannalu pissutaavoq killilersuinerit atorneqarnissaannut.
Piginnaasaq killilik atorneqarsinnaasoq atorneqassaaq inuiaqatigiinnut pingaarutilimmik suliaqarfiusut aammalu inuussutissarsiorfiusut suliaminnik ingerlatsiinnarsinnaanissaannik qulakkeerinninnissamut.