Pilersorneqartussat marloriaatinngussapput
Ukiut 30-t qaangiuppata pilersorneqartussat marloriatinngorsimassapput. Innuttaasunik ataatsimiisitsinerit aqqutigalugit naalakkersuisisooqatigiit aaqqiissutissarsiorniarput.
Inuit pilersorneqarnissaminnut pisinnaatitaaffeqartut marloriaatinngorsimassapput, pilersuisussalli taama amerleriartiginatik.
Ukiut 30-t qaangiuppata nunarput taama isikkoqalersimassaa, inuit ukioqassutsimikkut agguataarneranik siulittuutit allanngorujussuassanngippata. Taama inissisimasoqarnera anenrtuumik eqqarsalersitsivoq. Ingammik aningaasaqarnermut siunnersuisooqatigiit Naalakkersuisunit novembarimi nalunaarsuiartik siulleq saqqummiutereeraallu.
Nalunaarusiami naliliisoqarpoq atugarissaarneq ullumikkut atuuttoq taamaaginnassappat ukiuni 30-ni tulliuttuni ukiut tamaasa aningaasanut inatsimi 1 milliard koruunnit annikillineqartassaaq.
Naalakkersuisooqatigiinni Inatsisartut ilaasortat Inuit Ataqatigiinniit, Demokraatiniit Kattusseqatigiillu Partiianniit eqqarsarluartariaqalerput, tamatumunngalu kikkut tamaasa oqalliseqataaqqullugit.
Tamanna nunatsinni tamarmi innuttaasunik ataatsimiisitsisarnerni pissaaq. Unnukkut Sisimiuni Sanaartornermut Ilinniarfimmi arfineq marluniit qulinut.
- Atugassarititaasut pitsanngortinneqassappata inuiaqatigiinnilu aningaasanik atueriaaseq allanngorluinnartariaqarpoq. Taamaattumik pisariaqarpoq innuttaasut siunissaq pillugu isummersueqataanissaat, tamannami siunissami polikkissamut tunngaviussammat, naalakkersuisooqatigiit allakkiaminni oqarput.