Pilersuisumi aserorteriffigaat tillinniarfigalugulu
Arfininngornermi unnuakkut immiaaqqat karserpassuit, imigassat, sikaritsit nerisassallu Illoqqortoormiuni Pilersuisumi tillinneqarput.
Arfinngornermi unnuakkut angutit 25-nik ukiullit marluk Illoqqortoormiuni Pilersuisumi tillinniarput. Tillinniat pisiniarfimmi aserorterisimapput immiararpassuarnik, imigassanik, sikaritsinik nerisassanillu annissuisimallutik.
– Pisiniarfik kalerrisaaruteqanngilaq tillinniallu akornutissaqaratik aserortereriarlutik tilliniarsimallutik. Immiaaqqat sodavandillu qaleriissakkat arlalippassuit uppisissimavaat allallu pisiniarfiup iluani uppitinneqarsinnaasut uppikaasissimallugit. Matut igalaallu aserorteqqaarlugit tillinniat pisiniarfimmit anisimapput.
- Sapaammi ullaatungaa pisiniarfimmi sulisut tillinniartoqarsimasoq paasivaat, matu ammaannarmat igalaallu arlallit aseqqukuullutik, Illoqqortoormiuni politeeqarfiup pisortaa Olav Nielsen oqarpoq.
Pisiniarfimmi sulisut ikiorsiullugit angutit pineqartut marluk politiit nassaaraat. Nassaarineqaramik tillitamik ilarparujussui nerillugillu imereersimavaat, tillitallu sinneri Pisiffimmut utertinneqarput.
Angutit tillinniarsimanertik aserorterisimanertillu nassuerutigaat.