Pineqaatissiissut: Imigassartorsimalluni umiatsiarneq assigiinnarpaa imigassartorsimalluni biilerneq
Nunatta Eqqartuussiviata angut 62-inik ukiulik imigassartorsimalluni umiatsiarsimasutut pineqaatissippaa. Pineqaatissiissut sulianut allanut aalajangiisuusinnaavoq, aalakoorsimatilluni umiatsiamik aqunneq aalakoorsimatilluni biilernermut assersuunneqarmat.
Umiatsiamik angalaniaraanni imigassartorsimanermi 0,5 promille sinnerneqarsimassanngila, imaluunniit mianersortumik angalagaanni imigassartorsimalluni umiatsiamik angalasoqarsinnaava?
Apeqqut tamanna Nunatta Eqqartuussiviani pingasunngormat decembarip 20-ani aalajangiiffigineqarpoq. Nunatta Eqqartuussiviani siullermeerluni umiatsiamik angalasut imigassartorsimatillutik aaversinnermi 0,5 promille sinnersimappagu malittarisassaq nutaaq tunngavigalugu suliaq suliarineqarpoq. Malittarisassaq 2013-imiilli atuuppoq.
Suliaq naatsumik
Kapisillit Festivalimi 2020-mi suliaq aallartippoq, angut taamani 59-inik ukiulik gummibådimik mikisumik aquuteralalimmik ikaarnerata nalaani, festivalimut atatillugu politiit nakkutilliinerminni unitsippaat. Aaversinnerup takutippaa angutip imigassartorsimanerani aavani imigassaq aalakoornartortalik 1,77 promillemiittoq.
Suliaq Sermersuup Eqqartuussiviani marsimi 2023-mi suliarineqarmat angut pisuutinneqarluni eqqartuunneqarpoq, maannalu Nunatta Eqqartuussivia assiganik pineqaatissiisoqarpoq.
Akiligassinneqartoq
Angut 9.000 koruuninik akiligassinneqarpoq.
- Gummibådimik mikisoq aquuteralalik taamaallaat pineqaraluartoq, aalakoorluni umiatsiamik aquttup imminut allallu navianartorsiortittarpai. Taamaattumik nuannaarutigeqaara nunatta eqqartuussiviata unnerluussisussaatitaasoq isumaqatigigaa aalakoorluni biilertoq umiatsiamillu aquttoq aalakoortoq assigiimmik malittarisassanik maleruaasariaqarneranut tunngatillugu, unnerluussisussaatitaasoq Freja Linddahl Andersen oqarpoq.
Suliaq pingaarutilerujussuuvoq, unnerluussisullu naatsorsuutigaat tamanna politiit siunissami assingusunik suliaqalerneranni uppernarsaatinik katersuinissaannut ajornannginnerulersitsissasoq.