Pineqaatissinneqarsimasunut inissiisarfimmi nakkutilliisoq kannguttaatsuliorsimasutut eqqartuunneqarpoq
Pineqaatissinneqarsimasunut inissiisarfimmi nakkutilliisoq suleqatiminut kannguttaatsuliorsimanera pillugu qaammatini pingasuni pineqaatissinneqartussanngorpoq. Unnerluutigineqartup eqqartuussut Nunatta Eqqartuussivianut suliareqqitassanngortippaa.
Inuk sulinermini suleqatimi ilaannik arlaleriarluni kannguttaatsuliorsimasoq pillugu Sermersuup Eqqartuussiviani suliaq suliarineqarpoq.
Unnerluutigineqartoq unnerluussisussaatitaasup piumasaqaataanut naapertuuttumik eqqartuussivimmit eqqartuunneqartoq, Kalaallit Nunaanni Politiit ilisimatitsipput. Unnerluutigineqartoq qaammatini pingasuni piumasaqaatitaqanngitsumik pineqaatissinneqarsimasunut inissiisarfimmiittussanngortinneqarpoq, aamma eqqugaasumut 7.000 koruuninik taarsiisussanngortinngortinneqarluni.
Attuualaarineq patittaanerlu
Nuummi pineqaatissinneqarsimasunut inissiisarfimmi 2023-mi februaarip aallaqqaataaniit marsip aappaata tungaanut unnerluutigineqartup nakkutilliisutut sulinerani unnerluussutigineqartut pisimapput.
Unnerluutigineqartup, pineqaatissinneqarsimasunut inissiisarfimmi nakkutilliisup, suleqatini sisamariarluni quttoraatigut attuualaartarsimavaa arlaleriarlunilu nuluatigut patittarsimallugu. Aamma arlaleriarluni suleqatini tiguniartarsimavaa sulisullu perusuersartarfiannut eqqunniartarsimallugu.
Unnerluussissutigineqartut naapertorlugit aamma oqarasuaatikkut oqaloqatigiinnerit allaatigineqarput, tassani unnerluutigineqartoq suleqatiminut arnamut oqaluttuartarsimalluni ’akulaani assigisaalluunniit attuuanerarlugit’.
- Unnerluutigineqartup eqqartuussut ingerlaannaq suliareqqitassanngortippaa. Unnerluussisussaatitaasut unnerluussut naapertorlugu pineqaatissiisoqarnissaa sukateriffiginissaalu kissaatigaat, Kalaallit Nunaanni Politiit Sermitsiaq.AG-mut ilisimatitsipput.