Pineqaatissinneqartumut anaanaasoq: Paniga ikioqqullugu saaffiginnittarsimagaluarpunga

Qeqqata Eqqartuussiveqarfiani eqqartuussisoq eqqartuusseqataasartullu marluk inimi eqqartuussiviusumi issiapput. Toqutsisutut unnerluunneqartoq Danmarkimiippoq isiginnaarutikkullu peqataalluni. Illersuisoq unnerluussisussaatitaasorlu akileriillutik issiapput.

Tallimanngorneruvoq februaarip ulluisa 16-iat, eqqartuussinerullu inernera nalunaarutigineqartussaavoq. Nalunaaqutaq 10.52-nngortorlugu eqqartuussisoq eqqartuusseqataasartullu marluk inimut eqqartuussiviusumut iserput, isersimasullu ataqqinninnertik takutinniarlugu nikutserput.

Eqqartuussinerup inernera eqqartuussisup nalunaarutigaa. Danmarkimi tarnimikkut ataavartumik innarluutilinnut inissiisarfimmut sivisussusiligaanngitsumik inissinneqassaaq.

"Immaqa pinngitsoortinneqarsimasinnaagaluarpoq"

Toqutsisimasutut pineqaatissinneqartumut anaanaasoq inimi teqeqqup eqqaani issiavoq. Eqqarsaateqaqaaq. Panini isiginnaarutikkut qiviarpaa qullilillunilu.

Siorna issileruttornerani februaarip qaammataagaa Sisimiuni Tuapannguani unnukkut ataatsimoortoqarpoq. Tassani ataatsimoornermi arnaq 26-nik ukiulik tassanngaannaq takkuppoq, arnarlu 55-inik ukiulik savimmik ukusartumik sisamariarlugu kapillugu. Kingorna anaanani ataasiarlugu kapivaa qimaallunilu.

Anaanaasoq Sermitsiaq.AG-mut oqaluttuarpoq tamanna immaqa pinngitsoortinneqarsimasinnaagaluartoq.

- Kommunimut socialimukartaraluarpunga paniga pillugu qanoq iliorsinnaanerlunga ikioqqullunga. Qasseriarlunga kamallunga qiallungalu anisarpunga. Paninnik ikioqqusaraluarnikka itigartitaajuaannarput.

Inunnguutsimigut qaratsamigut ajoquteqartoq

Panini animinut sanilliullugu allaanerujussuusoq anaanaasup oqaluttuaraa. Aniusoq inunnut akuliusimasuuvoq, najaali tunuarsimaartuuvoq matoqqasuulluni inunnullu akuliusimasuunani. Kammalaateqanngilaq, sinittarfimminilu mattusimajuaannarluni.

Anaanaasup panimi suna akornutigineraa paaserusullugu ikioqqullugulu kommunimut arlaleriarluni saaffiginnittarsimavoq. Itigartinneqartarsimallunili. Periarfissamik allamik misiliivoq.

- Saaffigineqariarama misilillugu nakorsamut saaffiginnissutigeqqullugu ADHD-eernersoq misissortikkaluarpara, kisianni ajoquteqannginneraramikku. Taava januaarip aallartilaarnerani napparsimmavimmut inniminniissuppara misissorteqqikkumallugu autismeqarnersoq, anaanaasoq oqaluttuarpoq.

Anaanaasup napparsimmavimmut saaffiginninneranit qaammat ataaseq qaangiutereersorlu pania toqutsivoq. Toqutsinerup kingorna toqutsisoq Danmarkimi misissortippoq, tassani qarasaa tarrarsortilluni. Qaratsamigut kingornuttakkamik akornuteqartoq paasineqarpoq, anaanaasoq qullilluni oqaluttuarpoq:

- Qangali ikiorneqarsimasuuppat immaqa taammaattoqarnavianngikkaluarpoq.

Toqutsinermut utoqqatsissutaanngitsoq taassuma oqaatigaa, kisiannili piffissaagallartillugu ikiorneqannginneq qanoq kinguneqaratarsinnaanersoq oqaluttuaralugu.

Inuiaqatigiit sumigiinnaasut

Illersuisup Christina Johnsenip sapaatip-akunnerata siuliani pingasunngormat naggataarutaasumik oqaaseqarnermini inuit innarluutillit pisinnaatitaaffii pillugit isumaqatigiissut tigulaariffigaa. Taanna isumaqarpoq 26-inik ukiulik toqutsisimasutut pineqaatissinneqartoq inuiaqatigiinniit sumiginnagaasimasoq:

- Inuiaqatigiinni uani sumiginnaaneq annertoorujussuuvoq. Oqartussaasut assigiinngitsut iliuuseqarsimasinnaagaluarput. Ukiuni qulingiluani atuarfeqarfimmi Qaqortumi Paamiunilu attuumassuteqarnikuuvoq.

- Meeqqat atuarfiat naammassigamiuk Sisimiunut nuussimavoq, anaanaasoq oqartussaasunut saaffiginnittarsimagaluarpoq. Taamaammat isumaqarpunga inuiaqatigiinni sumiginnaanerup kingunerisaanik maani nikorfasugut.

Illersuisoq unnerluussisussaatitaasorlu ulluni 14-ini eqqarsarfeqarumapput.

Anaanaasoq allaaserisami kinaassutsiminik isertuussivoq, Sermitsiaq.AG-lli kinaanera ilisimavaa.