Pinerlunnikkut aningaasarsisimanermik malunnarunnaarsitsiniaasoq: Angalannginnermini aningaasarpassuit iisimagai
Angut 42-nik ukiulik Sisimiuneersoq Kangerlussuup timmisartoqarfiani ataasinngornermi tigusarineqarpoq. Taanna nassatamini aningaasarpassuarnik nassataqarpoq, aningaasanillu aamma iioraasimalluni.
Angut 42-nik ukiulik Kangerlussuarmi politiinit tigusarineqarpoq. Akitsuuserisut politiillu pasitsaassilluinnarsimapput angut aningaasarpassuarnik toqqortaateqarluni angalalersoq.
Pasitsaassinerlu uniorsimanngilaq. Angutip tigusarinerani paasineqarpoq angut angalannginnermini aningaasarpassuarnik iioraasimasoq. Nassataanilu aamma aningaasarpassuit nassaarineqarsimapput.
Kalaallit Nunaata Politiivisa ilisimatitsissutiginngilaat aningaasat qanoq amerlatigisut Danmarkimut angalannginnermi iineqarsimanersut, aningaasallu qanoq amerlatigisut nassataani nassaarineqarsimanersut.
Aningaasalli katillugit qanoq amerlatiginersut ilisimatitsissutigineqarpoq.
- Politiit isumaqarput angut katillugit 130.000 koruunit missaannik nassataqarlunilu iisaqarsimasoq, politiit tusagassiorfinnut nalunaaruteqarput.
Pinerlunnikkut aningaasarsiornerup malunnarunnaarsaaniaasutut unnerluunneqartoq
- Aningaasat pinerlunnikkut pissarsiarineqarsimasut malunnarunnaarsarniarlugit nunatsinnit anninniarneqarneri imminermini inatsimmik unioqqutitsinerinnaanngilaq, aammali nerisassaanngitsunik iioraanermi ulorianarpoq inuunermillu navialisitsisinnaalluni, politiit allapput.
Angut Sermersuumi eqqartuussivimmi marlunngornermi sassartinneqarpoq, pinerlunnikkullu aningaasarsiornermik malunnarunnaarsaaniarsimasutut unnerluunneqarluni ulluni arfineq-marlunni tigummigallagassanngortinneqarluni. Unnerluussut angutip akueraa.