Pinerluttoq qimaasoq mattuteqqippaat
Angut 27-nik ukiulik politiiniit qimaavoq augustip 17-iani Nuup eqqartuussivianiit aninermi. Angut marloriarluni pinngitsaaliisimasutut pasisaasoq nammineerluni pinerluuteqarsimasunut inissiisarfimmut ataasinngornerup marlunngornerullu akornanni uterpoq.
– Angut 27-nik ukiulik politiinit ilisimaneqarluarpoq. Taamaattumik piumasarisimavarput angut qaammatini pingasuni tigummigallagassanngortinneqassasoq eqqarsartaatsimigut misissorneqassalluni, taama Sermitsiaq.gl-imut oqarpoq Nuup politeeqarfiani pisortaagallartoq Frederik Heilmann.
Angut 27-nik ukiulik pinerluuteqarsimasunut inissiisarfimmi inissinneqarsimatilluni ukioq februarimi qimaasimasoq sapaatip akunnerat naanerani tassanilu marloriarluni pinngitsaaliisimasutut ataasiarlunilu persuttaasimasutut pasineqarpoq. Angut augustip 17-iani Nuup eqqartuussivianiissimavoq politiillu qaammatini pingasuni tigummigallagassanngortinnissaanik piumasaqarnerat eqqartuussiviup malissimavaa.
– Kisianni paarineqanngillatsiarnermini angut qimaasimavoq periarfeerutivissimallunilu, taama Frederik Heilmann oqarpoq.
Ippassaq unnukkut radioaviisi aqqutigalugu Nuup politiivisa angut 170 centimeterinik angissusilik ujaaralugu nalunaarutigaat. Angut nammineerluni pinerluuteqarsimasunut inissiisarfimmut utersimavoq ataasinngornerup marlunngornerullu akornanni.
– Angut maanna tigummigallarneqarpoq eqqaaneqareersutut eqqarsartaatsimigut misissorneqassalluni. Aamma soorlu oqartunga tigummigallarneqarpoq taamalu pinerluuteqarsimasunut inissiisarfimmiit aneqqusaanani, taama Frederik Heilmann oqarpoq.