Pinerluttulerinermi inatsit: Tarnikkut nakuusertarneq pinerluttuliornertut inissinneqassaaq

Januarip aallaqqaataaniit pinerluttulerinermi inatsit tunngavigalugu kikkulluunniit tarnimikkut nakuuserfigitillutik inissisimasut politiinut nalunaarutiginnissinnaanngussapput.

Timikkut persuttaasarnertut tarnikkut nakuusertarneq pinerluttulerinermi inatsit aqqutigalugu januarip aallaqqaataanit pineqaatissiissutigineqarsinnaanngussaaq.

Modelfoto / Pisuusaartitaq: Leiff Josefsen

Jensine Berthelsen Jensine Berthelsen

Published 4 October 2023 - 13:45

Annonse

Nunatsinni ataavartumik oqallisigineqartarpoq inoqatinut navianartorsiortitsillutik pilerlussimasut pineqaatissinneqartarnerat allanngortinneqartariaqarnersoq.

Politikerit arlallit pinerluuteqarsimasunut pineqaatissiisarneq atorunnaarsillugu pillaasarneq atuutilersinneqassasoq, inunnut navianartorsiortitsilluni imaluunniit aamma meeqqanut pinerluttoqarsimatillugu.

»Tarnikkut nakuuserneq inuunermut navianarsinnaavoq«

Taamaattorli Danmarkimisut pillaasarnerup atuutilersinneqarsinnaanera piffissaasimanngilaq, taamaattumik pinerluttulerinermi inatsit nutarterneqarlunilu ilaartorneqarpoq.

Danskit naalakkersuisuisa Nunatsinni naalakkersuisut suleqatigalugit pinerluttulerinermi inatsit maanna allanngortittussanngorpaat, tassani qanitariit akornanni tarnikkut nakuusertarneq pinerluttulerinermi inatsimmut ilanngunneqartussanngorluni.

Meeqqat Illersuisuata tarnikkut persuttaaneq pillugu inatsisiliortoqarnissaa piumasarivaa

Tassa januarip aallaqqaataani 2024-miit innuttaasut kikkulluunniit tarnimikkut nakuuserfigitittartut politiinut nalunaarutiginnissinnaanngorput naatsorsuutigalugulu nalunaarutiginninnertik pinerluttulerinermi inatsit naapertorlugu suliarineqassasoq.

Tamanna pivoq inatsimmi pineqartumi immikkut aalajangersagaqartussanngormat, qanigisariit/qanimut ilisarisimasareqatigiit akornanni tarnikkut nakuuserneq pinerlunnertut inatsisitigut isigineqalissammat. Taamaaliornikkut naqissuserniarneqarpoq tarnikkut nakuuserneq timikkut persuttaasarnertut ilungersunartigalunilu innarliisinnaassuseqartoq.

Pinerluttulerinermi inatsimmi tarnikkut nakuuserneq pillugu aalajangersagaq: nutaaq:

§ 88 a: Inuk inoqutigiinni allap akuuffigisaani ilaasoq qanittumilluunniit attuumassuteqartoq imaluunniit siusinnerusukkut inoqutigiinnut taakkununnga taamatut attuumassuteqarsimasoq, aamma piffissap ingerlanerani uteqqiattumik, allamut pineqartumut assuarnartumik aqutsissutitut naleqquttunik, ingasattumik nikassaanermik, ajortumik pinninnermik imaluunniit kannguttaatsuliornermik pissusilersortoq, matumani naqisimanninnikkut, pinngitsaaliinikkut imaluunniit nakuusernikkut nammineq inuuneqarnissamut siunissarlu pillugu nammineq aalajangiisinnaanissamut killilersuineq ilanngullugit, tarnikkut nakuusersimasutut eqqartuunneqassaaq.

§ 88 a. Tarnikkut nakuusernermut eqqartuunneqassaaq inoqutiminut imaluunniit inoqutinut allanut qanimut attuumassuteqartoq imaluunniit inoqutinut siornatigut taamatut attuumassuteqarsimasoq, aammalu piffissap ingerlanerani arlaleriarluni peqqarniitsumik narrunarsaasoq, innarliisumik imaluunniit kanngunarsaanermik pissusilersortoq, illuatungerisamut assuarnartumik aqutsilluni, inunnik peqateqarnermut ajortumik aqutsineq ilanngullugu.
(Oqaaseqatigiit kalaallisut allaqqaqqissaarnerat pissarsiarinnginnatsigit aaqqissuisoqarfimmit nammineq kalaallisuunngortitaq).

Inatsisissatut siunnersuut Danmarkimi 2019-mi pillaasarneq pillugu inatsisitigut allannguisoqarnikuuneranut assinguvoq.

Danskit inatsiseqarnermut ministeriat Peter Hummelgaard tassunga tunngatillugu oqarpoq:

- Tarnikkut persuttaasarneq pillugu inatsisissatut siunnersuut suliarineqarpoq Naalakkersuisut kissaateqrnerat aallaavigalugu – minnerunngitsumik aamma tarnimikkut persuttagaanermik eqqugaasut sivisoorujussuarmik kingunerlutsitsisinnaasarmata.

Tilioq: Tarnikkut nakuuserneq pinerlunnertut inissittariaqarpoq

- Taamaammat naammagisimaarnarpoq, maanna Kalaallit Nunaanni tarnikkut persuttaasarneq pinerlunnertut inatsisitigut isigineqalertussanngormat, taamaalilluta aamma pinerluttulerinermi inatsit aqqutigalugu ersersinniarparput tarnikkut persuttaaneq timikkut persuttaanertut naleqarmat.

Pinerlunnerit immikkut ittut pillugit inatsisitigut aalajangersaaneq nutaaq ilanngullugu inissinneqarpoq

Tarnikkut nakuusertarnerup pinerlunnertut isigineqalernerata saniatigut aamma inatsisit atuutsinneqarnerat pillugu ministeriaqarfimmiit isumagineqarpoq immikkut ittumik pinerluuteqarsimasoqarneranik suliaqartoqartillugu danskit immikkut ilisimasallit Kalaallit Nunaannit ikiortigineqartarnissaat.

Den Nationale Enhed for Særlig Kriminalitet (NSK), immikkut ittunik pinerluuteqartoqarsimatillugu suliaqartitat immikkut ilisimasallit Kalaallit Nunatsinni pinerluttoqarsimatillugu ikiortigineqarsinnaalissapput.

Tamanna pissaaq Kalaallit Nunaanni eqqartuussisarneq pillugu inatsisip allanngortinneqarneratigut, tamanna aqqutigalugu NSK taakkulu misissuillutik suliaqarnerminni suleqatigisartagaat Kalaallit Nunaanni atuutilissapput.

2021-2023-mut atatillugu politiit unnerluussisullu aningaasaqarnikkut inissisimanerat pillugu isumaqatigiissuteqartoqarmat, National Enhed for Særlig Kriminalitet Danmarkimi pilersinneqarpoq. Taamaalilluni politiit unnerluussisullu aammalu unnerluussisarnermut oqartussaasut ataatsimoortinneqalerput, taakkulu Danmarkimi suliaqarnermik saniatigut nunatsinni sulisinnaanissaat inatsisitigut matumani qulakkeerneqarpoq.