Pinerluttuliornernit eqqugaasunut siunnersuineq tapersersorneqarpoq
Pinerluttuliornernit eqqugaasunut siunnersuineq Kalaallit Nunaanni pissutsinut naleqqussagaasoq Folketingimi Kalaallit Nunaat pillugu ataatsimiititaliamit tapersersorneqarpoq.
Eqqugaasimasut eqqartuussiveqarnermut saaffiginninnerat sapinngisamik toqqissisimanartuusariaqarpoq, misigisimasat kingorna pitsaanerpaamik ingerlaqqissinnaaniassammata, aalajangiiffigisassatut siunnersuut Aaja Chemnitzip (IA) saqqummiussaa Folketingimi saqqummiunneqarmat taperserneqarluartoq pillugu Kalaallit Nunaat pillugu ataatsimiititaliaq allappoq.
Siunnersuisut naleqquttut
- Pinerluttuliornernit eqqugaasut siunnersuisarfimmik pilersitsinissamut siunnersortit naleqquttut pisariaqartut ataatsimiitaliap maluginiarpaa, Danmarkimilu naalakkersuisut Kalaallit Nunaanni siunnersortinik naleqquttunik pissarsinissartik kisiat isumagisinnaanngikkaat, nalunaarusiami februaarip 21-aneersumi allassimavoq, nangillunilu:
- Kalaallit Nunaanni pinerluttuliornernit eqqugaasunut siunnersuisarfimmik Folketingip maanna ataatsimiinnerata naannginnerani pilersitsisoqarnissaa aalajangiiffigisassatut siunnersuut Danmarkimi naalakkersuisunik pisussaaffiliinngitsoq ataatsimiititaliap isumaqatigaa, kisiannili Folketingip maanna ataatsimiinnerata naannginnerani Kalaallit Nunaanni pinerluttuliornernit eqqugaasunut siunnersuisarfimmik piaartumik pilersitsinissamut pilersaarusiortoqarnissaanik Inatsisinik Atuutsitsinermik Ministereqarfik pisussaaffilermagu.
Aaja Chemnitzip tapersersorneqarneq nuannaarutigaa tusagassiuutinullu nalunaarummi ima oqarluni:
- Kalaallit Nunaanni pinerluttuliornernit eqqugaasunut siunnersuisarfeqalernissaa Naalakkersuisut peqatigalugit ilungersuutigaara. Ukiuni 25-ni utaqqineqareerluni Kalaallit Nunaanni pinerluttuliornernit eqqugaasunut siunnersuisarfeqalernissaanik Danmarkimi naalakkersuisut kiisami isumaqatigiissuteqarfigigatsigit nuannaarutigaara. Eqqugaasut ukkatarinerullugit nunatsinni inatsisitigut inuit illersugaanerisa ineriartortinneqarnerannik tamanna angusaavoq pingaarutilik.
Eqqugaasimasunut aningaasaateqarfik
Pinerlunnernit aqqusinermilu angallannermit eqqugaasut pillugit ilisimasaqarnerulernissamut ikiunissamullu suliniutinut aningaasaliinissamik siunertalimmik Danmark 2014-imiilli eqqugaasimasunut aningaasaateqarfeqarpoq.
Eqqugaasimasunut aningaasaateqarfiup Danmarkimi aningaasaliissutineerput, inatsisit tunngavigalugit akiligassitsissimasut akiligassaannit inummut ataatsimut 500 koruunit aningaasaateqarfimmut illikarneqartarlutik, ukunanngaanniillu aaneqarsinnaallutik:
pinerluttulerinermut inatsisit §70 imaluunniit §74 unioqqutissimatillugit akiligassinneqarsimasunut, imaluunniit pineqaatissinneqarsimasunut,
pinerluttulerinermi inatsit §74 tunngavigalugu paarnaarunneqarsimasunut imaluunniit pineqaatissinneqarsimasunut,
aqqusinermi angallannermut inatsisit § 125 aamma § 126 unioqqutissimallugit aqqusinermi angallannermut allagartaajarneqarsimasunut,
aqqusinermi angallannermi § 127 tunngavigalugu aqqusinermi angalaqqusaajunnaarneq, imaluunniit
aqqusinermi angallannermi § 125, stk. 2, nr. 1-5 (allagartap ”kipineqarneranut”) tunngasuni
Inatsisinik atuutsitsinermut ministerip Peter Hummelgaardip Kenneth Fredslund Petersenimut, Danmarksdemokraterneersumut akissutaani ilisimatitsissutigineqarpoq, “Danmarkimi pissutsit assigalugit Kalaallit Nunaanni eqqugaasunut aningaasaateqarfik, pinerlulluni pineqaatissinneqarsimasut akiligassinneqartarnerannit aningaasalersorneqassasoq”.