Pingaarnerutitaq: Ammasuuneq takunnissinnaanerlu, qujanaq
Naalakkersuisunut ilaasortaasimasoq Jens Napaattooq pisinnaatitaaffimminik atornerluisimasunut qaammatini sisamani pinerluuteqarsimasunut inissiisarfimmiittussanngortinneqarpoq.Taamatut aalajangiivoq Østre Landsret ataasinngormat. Napaattooq pisuni 120-ni pineqaatissinneqarpoq, naalakkersuisunut ilaasortaagallarami ilassinninnermut kontu atornerlussimagamiuk. Naalakkersuisunut ilaasortap akileraartartut aningaasaataat 130.000 koruuningajaat atorsimavai nerersuarnernut tusaamasaalersimasumillu Københavnimi atortittartut bariannut pulaarnermut.
Napaattoorli atornerluisarnermi kisiartaagunanngilaq. Ammasumik isertuussaavoq politikerit nuimasuut amerlasuut ukiut ingerlanerini ilassinninnermut aningaasartuutit namminerlu piumasaarsuutit immikkoortikkuminaatsittarsimavaat.
Namminersornerullutik Oqartussani allaffissornikkut ingerlatsinerup qaqutigoortumik matoqqanerujussua pissutigalugu pisortat aningaasaataannik paareqqusanik, naalakkersuisunut ilaasortanut, Inatsisartut siulittaasuannut qaffasinnerpaamillu atorfilinnut atugassaritinneqartunik, atuivallaarnerup atornerluinerullu uppernarsarnissaat ajornakusoortorujussuuvoq.
Taamaallaat ammasuunikkut politikerit nuimasuut atuinerat qulaajarneqarsinnaavoq. Kajumissaarutigaarput junip 2-ani qinersinerup kingorna naalakkersuisunngortussat ilassinninnermut ersarilluinnartunik malittarisassiussasut tamannalu peqatigalugu tamakkiisumik takunnissinnaaneq atuutilersillugu, qaammatillu tamaasa tamanut saqqummiuttarlugit naalakkersuisunut ilaasortat ilassinninnermut atugaat, angalasarnerat aammalu tunissutisiaat imaluunniit pisortat akiligaannik tunniussaat.
Naalakkersuisut taamatut takunnissinnaanermik pilersitsinngippata politikerit nuimasuut innuttaasunit isiginerlunneqarnerat ingerlaannassaaq – atornerlueratarsinnaallutillu.
Imaanngilaq isumaqaratta nunami maani politikkikkut siuttut tamatigut taaneqarsinnaasut pinerluttut soqqusaatsut. Isumaqaannarpugut politikerit nuimasuut ilassinninnermut kontunit atugaannik saqqummiussineq tamakkiisumillu ammasuuneq peqataasinnaasut isummiutiinnagarpassuit suujunnaarsinnissaannut tamannalu peqatigalugu naalakkersuisunut ilaasortat ingerlatsinerannik pisariaqartumik ataqqinnilersitsillutik.
Jens Napaattooq, ilassinnilluni nerersuartarneranik atortittartullu bariannut akisuumut pulaarneranik tusagassiorfiit allaaserinnereersullu, 2005-imi ineqarnermut angallannermullu naalakkersuisutut soraarsitaasoq, nunatsinni politikerini nuimasuuni sussaanngitsumik kulturilinni ersarilluinnartumik pilliutigineqarsimavoq. Illersunngilarput, innersuussutigiinnarluguli nutaraalluni politikkikkullu misilittagaqarpiarani naalakkersuisunut ilaasortatut pissaaneqarnerup qeqqanut inissinneqariataarsimanera.
Inuit qinigaasa soorunami akisussaaffigaat pisortat aningaasaataannik akunnerminni atornerluisoqannginnissaa. Tamatumali saniatigut Jens Napaattuumut tunngasumi ilimanarluinnarpoq atorfilittaminit nuimasuunit qaninnerpaanit siunnersornerlunneqartorujussuusimasoq.
Apeqqutaavoq Napaattooq piumasaarsortuunersoq – imaluunniit naalakkersuisunut ilaasortarpassuartut siulimisulli, immaqalu suli taamaasiortutut, pissusilersuinnarsimanersoq.
Atornerluineq taamaallaat unitsinneqarsinnaavoq malittarisassanik ersarilluinnartunik atuutilersitsinikkut – kiisalu ammasuunermik takunnissinnaanermillu.