Pingaarnerutitaq: Imminut pisarisinnaapput
Naalakkersuisut namminersorneq pillugu taasinissamut qaammat ataasiinnanngortoq takuteqqippaat naalakkersuisooqatigiit tamarmik immikkut sammiveqartut.
Politikerit taakkorpiaat aamma maannakkut akisussaaffimmik annerusumik tiguserusulerput.
Isumasiuisitsineq Sermitsiap sapaatip akunnerani uani saqqummersitaata takutippaa, innuttaasut 60 proccentiisa namminersorneq tapersersoraat. Kisianni aamma maluginiagassaavoq 9 procentii immaqa namminersornermut tapersersuillutik taasiniarmata, taavalu 22 procentimik ikinnerunngitsut suli aalajangersimanngitsut.
Naalakkersuisooqatigiit 2009mut aningaasaqarnermut inatsisissamik ingerlatsinerata takutippaa naalakkersuisooqatigiit ataatsimiittarfimmi allami allamik oqaluuserisaqariarlutik ataatsimiittarfimmut allamut pigaangammik allamik aalajangiussaqartartut.
Siumup Atassutillu inatsisartuni ilaasortaatitaasa isumaqatigiissutigisimavaat kalaallit nunaanni nukissiorfiutileqatigiit Nukissiorfiit Inatsisartut ukiaanerani ataatsimiinneranni oqaluuserisassaannit peerneqassasoq. Siumut maannakkut kisimiilluni ilungersorpoq Nukissiorfiit piginneqatigiiffinngortinniarlugu, Atassut erseqqissumik naaggaartoq.
Aningaasaqarnermut inatsisissami sipaarniutit innuttaasut sanngiiffiginerpaartaatigut eqqussavai, pissutigalugu naalakkersuisut sanaartugassat tungaatigut 70 millioner koruuninik sipaarniuteqarniarmata, ilaatigut inissialiortiternerup tungaatigut. Sipaarniuteqarniarneq piffissami inissaminnik utaqqisut ukiuni 19ini utaqqisiariaqarfianni pivoq. Inuit inersimasut initaarnissaminut utaqqillutik inissiani mikisunik ilaquttaminni ineqartiterput. Utaqqinermi ilaqutariit ilappata meeqqat mikinerit inuunerat sakkortuumik aallartissaaq.
Meeqqat atuarfianni illut aserfallassimapput. Kingullermik sapaatip akunnerani uani Sisimiuni Minngurtunnguup Atuafia oqummik matusariaqarsimavoq – aserfallatsaaliisoqarsimannginneranut takussutissaq ilungersunartoq.
Namminersornermut inatsit ingerlatsiviit aningaasartuuteqqortuut nunatsinnut nuunneqarsinnaanerannut ammaassivoq, soorlu politiit, eqqartuussiviit aamma pinerluuteqarsimasunut isumaginnittoqarfik. Kisianni qinersisartut amerlaqisut aperisinnaassagunarput politikerit suliassaq taamaattoq kivissinnaassaneraat.
Innuttaasut taasitinneqarnissaat naalakkersuisullu ajornarsorsiornerat imminnut toqqaannartumik attuumanngikkaluartut qinersisartut qinersilerunik aalajangiiffigisassaat »aap«-imik »naamik«-millu imaqaannarunanngillat.
Innuttaasut novembarip 25-iani najoqqutassamik taasinissartik akerliussutsimut taasininngortissappassuk Namminersulernissamik anguniagaqarneq navianartorsiuleratarsinnaavoq, »naamik«-mik taasinermikkut imaluunniit taasinnginnermikkut naalakkersuisut »pillarsinnaallugit«. Eqqaamaneqassaaq isumasiuisitsisimanitsinni innuttaasut 9 procentii suli aalajangersimanngillat, taamaallaalli immaqa tapersersorunarlugu, aammalu suli 22 procenterpassuit suli angissanerlutik naaggaassanerlutilluunniit isummerfigisimanngikkaat.
Aamma maluginiagassaavoq kinguaariit inuusunnerusut namminersornermik ingerlatitseqqiisussat utoqqaanerusunit nalorninerummata. 18iniit 29nik ukiullit akornanni affaat inulaarlugit namminersornissaq tapersersorpaat. Inuusuttut ilinniartut namminersorneq pillugu isumalioqatigiissitaliaq suli aallartinngitsoq Sermitsiamut namminneq oqaluttuarput, alloriarnerup tullia tigutinnagu namminersornerulluni oqartussaaneq aaqqeqqaartariaqartoq.