Pingaarnerutitaq: Nakuuserneq nakuusernermik pilersitsisarpoq
Ataasinngornerit tamaasa Nuummi politiit sapaatip akunnerata naanerani suliaminnik nalilersuisarput.
Tallimanngornermi novemberip 16-ianniit nalunaaqutaq 8.00-imiit ataasinngornermut novemberip 19-iannut nalunaaqutaq 8.00 tungaanut politiit nalunaarusiaat nunami illoqarfiit pingaarnersaanni novemberimi sapaatiup akunnerata naanerani pisunik imaqarpoq, akissarsiat nungunniarneqarneranni silarlunneralu pissutigalugu amerlaqisut angerlarsimaannarneranni.
Inatsisit tunngaviusut naapertorlugit killisiuineq: Tallimanngormat ullaap tungaani angut 24-inik ukiulik inatsisit tunngaviusut naapertorlugit killisiorneqarpoq, novemberip 13-ianni Tuujummi arnamik 39-inik ukiulimmik sualuttorujussuarmik saassussisimasutut unnerluutigineqarluni. 24-inik ukiullip aalakoornini pissutigalugu saassussinerup nalaani qanoq pisoqarsimanersoq eqqaamanngilaa. Suliassap naammassillugu misissorneqarnerani angut sapaatip akunnerini pingasuni tigummigallagassanngortinneqarpoq.
Isumaginninnermi pigaartunut attaveqarneq: Sapaatip akunnerata naanerani politiit pingasoriarlutik isumaginninnermi pigaartut attaveqarfigisariaqarsimavaat, angajoqqaat aalakoorlutik qitornatik ukiukitsut kisimiitillugit qimaannartarsimammatigit.
Nuummilu politiit nalunaarusiaat inerniliivoq:
Sapaatip akunnerata naanerani politiit katillugit 14-inik nalunaarusiorput ilaatigullu illumi perulluliornerit 12-it, aalakoortut 10-t aqqusinermilu perulluliornerit marluk pillugit nalunaarfigineqarsimallutik.
Sapaatip akunnerata naanerani politiit suliaat aaqqissuisoqarfimmi naammagittartumik misigittaatsumillu tiguneqarput:
– Nå, sapaatip akunnerani saqqaliussassatsinnik sapaatip akunnerata naanerani pisoqarsimanngilaq.
Kisiannili, uumaak?!
Ilumut nakuusernerit aalakkunnerillu politiit nalunaarusiaanni pissusissamisuuinnartutut akuersaassavagut, aqquserngit quasaqisut anorlernerujussualu eqqaallatsiarneqaannartut?
Akissut ajornaatsoq tassaavoq Naagga!
Suliassaq ajornakusoortoq tassaavoq Naaggap taassuma qanoq iliuuseqarfigineqarnissaa.
Inuk kinaluunniit ajortuulluni inunngornikuunngilaq, inuullu kialuunniit nammineq inuunini allalluunniit inuunerat nakuusernermik ajortisarusunngilaa.
Nakuusernerli qanoq iliorsinnaannginnermut qisuariarnerukulasarpoq.
Amerlaqaallu kalaallini inuiaqatigiinni qanoq iliorsinnaannginnermik misigisimasut.
Angutitut piniartorsuartut pilersuisuuneq qangarsuarli qaangerneqarsimavoq, ullumikkullu nuliaasup angerlarsimaffik atatittuuvaa pisiniarfimmi allaffimmiluunniit sulisarnermigut.
Aaqqiissutissaq tassaavoq ilinniagaqarneq.
Nunaqarfinni isorliunerusunilu inuiaqatigiit katitigaanerat ilisimaneqarluartoq atorunnaariartorpoq, nunatsinnilu inuiaqatigiinni assigiinngissuteqarneq ullumikkut aatsaat taamak annertutigaaq.
Aaqqiissutissaavoq ilinniagaqarneq.
Ineqarnermi atugassarisat pitsaanngitsut suliffissaqannginnerlu nikallungatitsilersarput, taamaattumillu kamajanarsisarpoq kamassaatit anninnissaannut.
Aaqqiissutissaavoq ilinniagaqarneq.
Ukiuni 28-ni namminersoreernermi suli inuppassuaqarpoq imminnut nikageqisunik imminnullu naleqartippianngitsunik, tamannalu nakuusernermik taarserneqartarpoq inuiaqatigiit tulleriiaarneranni suli apparnerutitsisumik.
Aaqqiissutissaavoq ilinniagaqarneq.
Nakuusernerulli akiorniarnera siullerpaamik inuit niaquanni pissaaq.
Soorlu sapaatip akunnerani isumaliutersuummik allattoq imatut allattoq: Nakuuserneq nakuusernermik pilersitsisarpoq.
Taamaattumik pingaaruteqarpoq nakuusernerup unitsinneqarnissaa, kinguaariinnik allanik suli tunillaannginnerani.
Aaqqiissutissaanngillat qimarnguiit amerlanerusut meeqqanullu tarnip pissusiinik ilisimatuut amerlanerusut, tassaavorli inuiaqatigiinnik pilersitsinissaq nakuusernerup pissutaa avaqqullugu: Qanoq iliuuseqarsinnaannginneq nungusaataasorujussuaq.
Kalaallit Nunaanni paqumisat arlallit samminialersimavagut ullumikkullu sumiginnaaneq, qanigisanik kinguaassiuutitigut atornerluineq aammalu hashimik imigassamillu atornerluinerit akuersaarusunngilagut, inatsisartulli ataatsimiittarfiata saavani nipituuliorluta akerliussutsimik takutitsisarluta.
Nakuusernerli suli iliuuseqarneruvoq kanngunartoq, oqaloqatigiissutigiuminaatsitarput.
Aallarniutaasinnaavoq nakuusernerup oqaloqatigiissutigineqarnera sapaammi novemberip 25-ianni, ulloq taanna FN-ip arnanut nakuusernermut akerliuffittut ulloritimmagu.