Pingaarnerutitaq: Neqinik tunisassiat amerlanerusut
Naalakkersuisut Kujataani inuussutissarsiornermik ineriartortitsinermi nutaamik suliniuteqarnialerput qujarunneqartariaqartumik.
Tassaavoq toqoraavimmut nutaamut aningaasaliissuteqarneq ullutsinnut naleqquttunik suliffissalimmik aammalu periarfissiisoq ilaatigut nunatsinni tuniniaavimmi pisariaqartitanik naammassinninnissamut, ilaatigullu nunatsinnit neqinik avammut tuniniaanissamut pisariaqartitamik naammassinninnissamut.
Taamatut eqqarsarneq piffissaq eqqorluarlugu peqqissaarnerussaaq, pissutigalugu silap pissusiata allanngoriartornera Kujataani nunalerinermut iluaqutaammat. Pissusissamisoornerussaaq allanngornerit tamakkua inuussutissarsiutip suliffissuaqarnerullu, ineriartornerup tamassuma kingunerisassaata, ineriartortinnissaannut atorluarniassallugit.
Uumasuutilli amerlinissaannut pisariaqartumillu ivikkanik naatitsiviit annertusinissaannut qununngitsoqanngilaq toqoraaveqanngippat uumasunik tigooraasinnaasumik tunisassianillu atuisartut piumasaannik ineriartortitsisinnaasumik tunisassiorsinnaasumillu.
Tamanut iluaqutaassaaq ineriartornermut tamatumunnga pisortat aallarnisaasuuppata. Piffissaq ungasinnerusoq isigalugu takorloorneqarsinnaavoq nunat allamiut aningaasaliisut siumut isigisut toqoraavimmi peqataarusuttut, pissutigalugu takusinnaagamikku neqinik tunisassianik nalissaqanngitsunik, Kalaallit Nunaanni tunisassiarineqarsinnaasunik, tuniniaavissaqartoq.
Kujataani savat nersussuillu saniatigut avannarpasinnerusumi tuttuuteqarfinnut umimmaateqarfinnullu tunngavissaqassaaq Kujataani toqoraavimmut pilersuisinnaasunik. Nammineq niuertarfiutitsinnut neqinik pilersuisuuginnassanngilaq. Aammattaarli neqinik immikkut ittunik avammut tuniniaasuusinnaavoq.
Periarfissalli tamakkua arlaannit takuneqarnissaasa aallartinneqarnissaasalu tungaanut toqoraavik nutaaq New Zealandimit Argentinamillu nersussuarnik savaaqqanillu ilivitsunik eqqussuisinnaassaq, nunatsinni tuniniagassatut toqoraavimmi tunisassiarineqarsinnaasunik, taamaasilluni aallaqqaataaniilli ukioq naallugu suliassaqartitsissalluni.
Soqutiginartumik eqqarsaatit tamakkua qanga saqqummiunneqareersimapput, Keld Askær KNI-mi pisortaagallarmat aammalu Danish Crown toqoraavimmik nutaanik isumassarsialimmik ineriartortitseqataagallarmat. Tamanikkut siunertarineqarpoq neqinik tunisassiornissaq, sumi tamani misiligarneqarsinnaasunik. Ajoraluartumilli qanoq pisoqarpiarsimanngilaq.
Maanna KNI misileeqqinnialerpoq neriuutigissavarpullu Neqimit siunnersuut Naalakkersuisut tamatumuuna tusaaniarnerussagaat.
Tamatumunnga pisariaqarput siunissamut Kujataanil suliffinnut nutaanut, pisariaqartinneqartorujussuarnut, aningaasaliissuteqarnissaq.
Toqoraaviup nutaap angisuup tunisinissamut periarfissaqartitsisup savaatillit aallartitsisullu allat nerisassanik amerlanerusunik pilersitsinissamut piumalersissavai, taamaasilluni annertunerusumik immitsinnut pilersorsinnaalersilluta, immaqalu neqinik nioqqutissanik kusanartunik neriniartarfinnut immikkut ittunik sammisalinnut immaqalu pisiniarfissuarnut immikkut ittunik sammisalinnut avammut tuniniaalersilluta, nerisassanik immikkut ittunik, akia aalajangiisuutinnagu pitsaassutsimik mamassusaanillu samminnittunik tuniniaasartunut.