Pingaarnerutitaq: Pissaanilittut makitaniarneq
Alcoamik ersiginninneq ingasaassineruvoq!« Taamatut ersaritsigisumik nalunaajaateqarpoq Inuussutissarsiornermut Naalakkersuisoq Siverth K. Heilmann, Atassut, KNR-imi. Inatsisartut ingerlatsinermut pilersaarutaat, Kalaallit Nunaata aluminiumik aatsitsiveqalernissaanik aalajangiivinnermik kinguneqartussaq, pillugu nalunaajaatimigut isornartorsiuinerit tamaasa tunuartippai.
»Isornartorsiuisuuvoq Kalaallit Nunaanni Pinngortitamik Avatangiisinillu Illersuiniaqatigiiffik Avataq, taanna isumaqarami suliniut pillugu peqqissaartumik oqallinnissamut piffissaqanngitsoq.
Maannangaaq, aluminiuleriffimmik pilersaarummut atatillugu Namminersornerullutik?Oqartussat aallarniutaasumik misissuileruttortut qulaajaaleruttortullu, siusippallaaqaaq oqaatigissallugu aalajangiivinnginnermi peqqissaartumik oqallinnissamut piffissaqarnersoq.
Suliniut pillugu Inatsisartut aappaagu aalajangiisuusumik aalajangiissapput.
Avatalli ernumassuteqarnera - tunngaviatigut - pimoorunneqassaaq. Kialuunniit soqutiginngilaa pilersaarutip nukingiunneqarnissaa. Naalakkersuisunullu ilaasortamut kusassaataassagaluarpoq makitaniartutut isiginninnani assani isaattuuppagut innuttaasunullu qulakkeerutigalugu naalakkersuisut piffissamik qulakkeerinnissasut, minnerunngitsumillu suliniut pillugu oqallinnermut atatillugu tusaaniarusuttut.
Oqaluttuarisaanerup takutippaa Inatsisartut akulikippallaamik aalajangiisuusumik aalajangiisartut - tamatumalu kingorna paasillugu aalajangernermut tunngavigisaq eqqarsaatigilluagaanngitsoq.
Ilaatigut angallannerup aaqqissuussaaneranik aalajangiiniarneq tamarmi, sinerissamik sinersortaatinik angalanermik aseruisoq, ersisitsivoq, ilaatigullu innaallagissap, erngup kiassarnerullu assigiissumik akeqarunnaartinniarneranni aalajangiinermi Inatsisartut torrallaanerluttorujussuupput, tamatumani nunaqarfinni isorliunerusunilu innuttaasut eqqortumik misigisimasinnaallutik aalajangernermut atatillugu pimoorunneqarsimanatik.
Siverth K. Heilmannip aluminiuleriffimmik pilersaarut illersorluinnarpaa. Tamanna ataqqivarput. Makitaniartutulli isiginninneragut ulorianartoqarpoq naalakkersuisunut ilaasortaq pilersaarumminut ulorianartorsiortitsinerpaajussasoq.
Siunnersuinermik ingerlatsivimmit Niras Greenlandimit nalunaarusiakkut tikkuarneqarpoq pingaaruteqartoq aluminiumik suliniut atituumik tapersersorneqartariaqartoq, suliniut iluatsilluassappat.
– Innuttaasunut tamakkiisumik paasissutissiineq aammalu aluminiumik tunisassiornerup kingunerluutigisinnaasaanik pimoorullugu misissuinikkut oqallinnikkullu qulakkeerneqarsinnaavoq aalajaatsumik peqqissaartumillu politikkikkut aalajangiinissaq, nalunaarummi allassimavoq.
Immaqali Siverth K. Heilmannip innuttaasunik oqallinnissaq Alcoamit ersigineruvaa?