Pingaarnerutitaq: Qamannga pisumik pilluaritsi!

Qularnanngitsumik amerlaqisut tupaallaatigisaannik aamma Kalaallit Nunaat piluaqquarput, tassa Siumut partiitut siuttuusutut namminersornerunerup nalaani tamarmi, aamma qanittukkut ukiunik 30-inngortorsiortussami, akisussaasuusimammat.

Ukiuni tamakkunani tamani Siumut partiitut anginerpaatut siuttuusutullu naalakkersuisuusarsimavoq, taamaasillunilu naalakkersuisutut siulittaasuuffik kisermaatipajaarsimallugu.

Aqutsinerli aamma akisussaaffeqarpoq. Qularutigivallaanngilarput Siumup akisussaassutsini nalinginnaasumik ilisimasimagaa, isumaqatigaarpullu partii - malunnartunik kukkussuteqartaraluarluni - annertunerusumik akisussaassusilimmik politikkeqarsimasoq.

Kalaallit Nunaata nutaaliaasup, demokratiskiusup ineriartortinneqarnerani aammalu nunami inatsisartoqarnerup piareersarneqarnerani Siumut aalajangiisuulluinnartumik inissisimasimavoq. Siumullu partiitut naalakkersuisuusutut ukiuni qulikkaani pingasuni Kalaallit Nunaanni piviusumik politikkimi tamangajammi peqataasarsimavoq.

Ilaat isumaqassapput ukiorpassuarni naalakkersuisunut akisussaasuusimanermigut partii qasusuulersimasoq, Sermitsiallu allaaserisakkut maana akuttunngitsumik isummat taamaattut saqqummiuttarsimavai: Siumut politikkikkut »qasusuulersimasoq«, ileqqupiluit, soorlu qanigisanik atorfinitsitsisarnerit ikinngutinillu kissartuussisarnerit partii aserorsarsimagaat. Siumukkormiut politikkut nutartertariaqartut piffissap ilaani illua’tungiliuttutut.

Manna tikillugu isuma tamanna qinersisartut isumaqatigisimanngilaat. Qinersinerit tamaviisa Siumup nunatsinni inuiaqatigiinni inissisimanini nunatsinnilu politikkimi siuttuunini erseqqissartarsimavaa. Tassuuna ilinniagassaavoq Siumut tunulliunneqanngisaannassasoq.

Kalaallit Nunaanni inuppassuarnit Siumut aallaaviuvoq, kukkunerunngilarlu naalakkersuisut siulittaasuata Hans Enoksenip tikkuarmagu Siumut nunatsinni inuiaqatigiinni sorlaqartoq. Partiip tunngavigisimavaa Danmarkip Kalaallit Nunaannik nunasiaqarneranut akiuunneq - akiuunneq ineriartortoq kingornalu 1997-imi partiip pilersinneqarneranik kingunilik.

Oqartoqarsinnaagunanngilaq Siumup Danmarkimi Skandinaviamilu allami partiit socialdemokratiusut maligassatut isigigai. Qularutissaanngilarli ukiuni tamani politikkikkut ataqatigiittoqarsimasoq. Tamannalu aamma takuneqarsinnaavoq inuuissiornerup nalliussineqarnerani Socialdemokratit Danmarkimeersut ataqqinaammik tikeraatut qaaqquneqarsimanerisigut.

Pappialatigut Siumup ullumikkut sulissutigai inuiaqatigiit innuttaminnik naqisimanninngitsut, akerlianik innuttaasut sammisaqarnissaannut periarfissiilluni - inuiaqatigiit aningaasarsiornikkut isumaginninnikkullu nammaqatigiissut.

Uagutsinnilli isigalugu Siumup isummamigut tunngavii politikkimillu partiip ulluinnarni ingerlatsinera akulikippallaamik assigiinngissuteqartarsimapput. Nunami, politikkikkut mamianartuliortarnerpassuarmigut ilisimaneqartumi, qularutissaanngilaq politikkikkut partiip aalajangiisuusup aamma akisussaaffigigaa politikkip ajortortaani qanoq pisoqartarnera.

Siumulli akisussaaffik tamanna arajutsisimanngilaa - taamatut pitsaasumik isummerfigerusupparput tupaallannartumik nutaamik eqqarsarneq, partiip inuuissiornerminut aammalu ulluni makkunani Qaqortumi immikkut ittumik ataatsimeersuarnermut atatillugu, saqqummiussaa.

Piffimmut naapertuuttumik partiip qulaanit aqutsineq partiillu inatsisai oqartussaaqataaffiunngitsut atorunnaarniarpai. Maanna partiip aaqqissuussaanera oqartussaaqataaffiunerulissaaq, partiimi ilaasortat sunniuteqarnerulissapput, partiip pingaarnerusutut anguniagai nutarterneqassapput - partiillu siulittaasua ilaasortat tamarmik taasitinneqarnerisigut toqqarneqartassaaq.

Oqaatigineqareersutut Siumut tunulliunneqanngisaannassaaq. Immaqa partiip ammaarluni politikkikkut siuttuuinnassaaq Kalaallit Nunaatalu siunissaanut aqqutissiuussilluni.

Nipaatsumik kajumissaarutigissavarput partii siuttuugaluarluni imminullu paasilluarsinnaagaluarluni partiip paasissagaa Kalaallit Nunaata siunissaa pisariaqartumik inuit qinigaannik suleqatigiissunik tunngaveqartariaqartoq. Ataatsimut politikkimik oqalunneq tamaat puigorsiuk; Kalaallit Nunaanni politikkikkut aquttuunissamut Siumut kisermaassisussaatitaanngilaq, Siumulli pinngitsoornissaa Kalaallit Nunaata ajornakusoortissavaa.

Qamannga pisumik pilluaritsi!