Pingaarnerutitaq: Unammilligassat nutaat
Naalakkersuisut sila pillugu pitsaasumik politikkeqarnissaannik ujartuiuarpugut – erseqissunik anguniagaqarlunilu inuttaasunut inuussutissarsiortunullu paasisitsiniaanertalimmik. Politikkimik sakkortuumik anguniagalimmik, iperaataq neqittallu iluaqutigalugit innuttaasunik inuussutissarsiortunillu ikummatissanik atuinermik apparsaarusulersitsisumik. Nunatsinni biileerniarfinnik biilinik innaallagissamoortunik nioqquteqarumallersitsisumik, tamakkumi silarsuarmi atugaalaartorujussuanngoreermata. Juuni 2009-mi naalakkersuisunngoortut innuttaasut inuiaqatigiit ineriartornermut piginneqataasutut misigisimalersissallugit neriotrsuinikuupput.
Nunatsinni inuppassuaqanngitsoornavianngilaq qanoq iliorluta CO2-mik apparsaanissatsinnut siunnersuutissaqartunik.
Tamanna tamatta suleqataaffigisassaraarput, naalakkersuisullu tassunga naleqquttumik ingerlatsissapput.
Inuinnat peqaqaatinneqarunik suliassamut peqaqataasutut misigisimalissapput.
Namminersorlutik Oqartussat Københavnimi saqqummersitsinerat In The Eye Of Climate Changemik taguutilik ullumikkut ammarneqarpoq. Namminersornerullutik oqartussat suliffeqarfiussui saqqummersitsinermi tunulequtaapput. Innuttaasulli sumiippat?
Kalaallit ajornartorsiutivissuat. Silap pissusaaa allanngornerinit, nunat suliffissuaqarfiusut pisuut pilersitaannit eqqugaavugut. Uagut silap pissusaata allanngornerannit eqqugaavugut, CO2-millu aniatitsinermik apparsaanissaq peqataaffigisariaqarparput, peqatigitilluguli aamma inerisaarusuppugut aningaasaqarnikkullu namminiilerusulluta siunissamilu periarfissanik nutaanik pilersitserusulluta. Suliffissuaqarnermik inerisaanikkut CO2-mik aniatitsineq anginerulissaaq, nunat pisuut pisarnerattut – taannalu ajornartorsiornermut peqqutaavoq – uagutsinnullu iluaqutaanani.
Silap pissusaata tungaatigut anguniakkagut appasippallaarnerarlugit isornartorsiorneqarpugut. Nunat tamatuminnga pisuusut akornanniilerpugut.
Naalakkersuisut innaallagissiornikkut CO2 aniatinneqartartoq apparsarniarlugu erngup nukinganit nukissiorfinnik sanaartortitsipput. Aammali illut iluarsaanneqartariaqarput. Namminersorlutilli illuutillit kissarsuutiminnik uuliatortunik erngup nukinganit innaallagissamoortunik taarsiinissaat iluamik anguniarneqanngilaq.
Naalakkersuisut aatsitassarsiornissamik nutaanillu suliffissualiortiternissamik, soorlu aluminiuliorfiliornissamik annikillisaajumannginnerat paasinarluinnarpoq. Tamanna inuiaqatigiinnut akisuallaassammat. Taamaattumik naalakkersuisut 2020-p annikillerinngikkallarnissamut akuerineqartariaqarput.
Apeqqutaavoq qeqertap Issittuniittup CO2-mik aniatitsinerulernissaa nunarsuup sinnerata akuerisinnaaneraa.
Aammali apeqqutaavoq mingutsitsisuusoq akiliisussaannginnersoq? – Imatut paasillugu aatitassarsiorfiit suliffissuillu nutaat CO2-mik aniatitsinertik namminneq akilertarlissuk. Sooq innuttaasut (akileraartartut) suliffissuit tamakku CO2-mik mingutsitsinerat akilertassavaat? – Tassa aniatitsinissamut akuerineqassanngikkutta.
Suliffissuit tamakku silarsuatsinnik aserorterinertik aningaasarsiutigaat. Taakku aaqqiissutissanik nassaaqqunerisigut CO2-mik aniatitsineq apparsarsinnaavarput. Nunatsinni suliffissualiorumagunik CO2-mik aniatitsinertik qanoq pissanerlugu namminneq iluarsisariaqarpaat.