Pingasunngornermiit nutaat 591-it tunillatsissimasut
Ullormi kingullermi tunillatsissimasut nutaat 222-t nassaarineqarsimapput.
Nunatsinni Nakorsaaneqarfiup tallimanngornermi ullup-qeqqanut kisitsisinik nutarterinermi ilisimatitsissutigaa, pingasunngornermi kingullermik kisitsisinik nutarterisoqarmalli coronavirusimik tunillatsissimasut nutaat 591-it nassaarineqarsimasut. Sisamanngornermi tunillatsissimasut amerlassusaannik saqqummiussisoqarsinnaasimanngilaq teknikikkut ajornartorsiuteqartoqarnera pissutigalugu.
Tunillatsissimasunit nutaanit 591-iusuni 222-t ullormi kingullermi tunillatsissimasuupput.
- Annertuumik suli tuniluuttoqarpoq, pingaartumik illoqarfinni anginerusuni, aammali illoqarfinni nunaqarfinnilu amerlanerusuni tuniluunneq annertusiartortoq takuneqasinnaavoq, nakorsaaneqarfik allappoq.
Sumiiffinni aqqaneq-marluuusuni ukunani tunillatsittoqarsimavoq:
- Upernavimmi 1
- Ilulissani 35
- Uummannami 1
- Qasigiannguani 5
- Aasianni 2
- Sisimiuni 12
- Kangerlussuarmi 5
- Maniitsumi 5
- Nuummi 498
- Narsami 21
- Qaqortumi 4
- Eqalugaarsunni 2
Nakorsaaneqarfimmit ilanngullugu ilisimatitsissutigineqarpoq, inuit katillugit sisamat suli uninngasut, ataaseq Ilulissani pingasullu Nuummi, Nuummi uninngasoq ataaseq peruluttut uninngavianni uninngatinneqarluni.
Nunatsinni Nakorsaaneqarfimmit eqqumaffigeqquneqarpoq, coronamut misissortissimanermi akissutisiassat nalunaaquttap-akunnerisa 24-t ingerlaneranni tiguneqartarnissaat naatsorsuutigineqarunnaartoq. Laboratooriap misissugassanik tigusineraniit akissutisinissamut nalunaaquttap-akunneri 48-t ingerlasinnaapput. Tamatumunnga pissutaavoq, maannakkorpiaq misissortittorpassuaqartarnera.
Pingasunngornermi nutaanik 270-inik tunillatsittoqarsimasoq nalunaarutigineqarpoq, Nunatsinnilu Nakorsaaneqarfimmi tassunga atatillugu kaammattuutigineqarluni, tuniluuttoqarnera killilersimaarniarlugu sapinngisamik inuit ikinnerpaat akornanniittoqartassasoq.
- Sukkasoorujussuarmik tuniluuttoqarpoq, sumiiffinnilu arlalinni tuniluuttoqangaatsiarluni. Nunatsinni Nakorsaaneqarfimmit taamaammat kaammattuutigineqarpoq, katersuuttut sapinngisamik akuleruffigineqarnaveersaarneqassasut, aamma angerlarsimaffinni, Nunatsinni Nakorsaaneqarfik pingasunngornermi allappoq .