Piniarnermut inatsit sukaterneqalerpoq

Siumut sinnerlugu Inatsisartunut ilaasortaq Lars Mathæussen siunnersuuteqarpoq Nunatsinni sivikinnerpaamik ukiut pingasut najugaqarsimagaanni aatsaat sunngiffimmi aalisarsinnaanermut piniarnermullu akuersissummik pissarsisoqarsinnaalissasoq. Siunnersuutip ilaa Naalakkersuisut ilalerpaat.

Marlunngornermi Inatsisartut ataatsimiinnerminni oqaluuserissavaat sunngiffimmi aalisarsinnaanermut piniarsinnaanermullu malittarisassat. Lars Mathæussen siunnersuuteqarpoq ukiuni pingasuni Nunatsinni najugaqareersimagaanni aatsaat sunngiffimmi aalisarsinnaallunilu piniartoqarsinnaalertariaqartoq. Siunnersuummi pineqartut ilgaat sunngiffimmi tuttunniarsinnaanermut aamma umimmanniarsinnaanermut malittarisassat.

- Aalisakkat qanoq tisanissai, tuttut qanoq aattorneqarnissai anorersuartussaatilluguluunniit toqqup qanoq napparneqarnissaa pingaarutilerujussuupput ilinniutigissallugit, sillimaniarneq aamma eqqarsaatigalugu. Nunatta imarsua peqqarniissinnaasoq, sikusartumilu sikup ulorianaatigisinnaasai aamma pingaaruteqarpoq ilisimasaqarfiginissai, Lars Mathæussen siunnersuumminut tunngavilersuivoq, ilanngullugulu oqaatigaa piujuaannartitsinissamik siunertaqarluni atuinissamut siunnersuut aamma attuumassuteqartoq.

Allannguinissaq pisariaqarsoraa
Naalakkersuisulli isumaqarpoq sunngiffimmi aalisartarneq aalisakkanik piujuaannartitsinissamut sunniuteqarpianngitsoq amerlasoorsuakkaarlugit aalisarnissamut sunngiffimmi aalisartartut periarfissaqanngimmata. Tuttunilli umimmannillu piniarnermut siunnersuutip tunngasortai taperserpaat.

Paasinninnera malillugu Piniarneq aallaaniarnerlu inatsisip allanngortinnissaa pisariaqarpoq aalisarnermulli inatsisip allanngortinnissaa pisariaqarani, aalisarnermut, piniarnermut nunalerinermullu naalakkersuisoq Finn Karlsen Siumumeersoq akissuteqaammini allappoq.

Siunnersuut marlunngornermi Inatsisartuni oqaluuserineqassaaq.