Piniartoq: Tuttut nappaatilit amerliartorput
Tuttunniartartut arlallit nerineqarsinnaanngitsunik tuttuttarsimapput. Tuttunniartarfissuup eqqaani najugallit misissuisoqarnissaanik kissaateqarput.
Tuttunniarneq naammassimmat Maniitsup Nuullu akornanni Niaqunngunami Atammiup eqqaaniittumi tuttunniarsimasut eqqarsaammersimapput.
Aviisi AG allappoq.
Pakatsinermut pissutaavoq tuttut napparsimasut ikinngitsut pisarineqarmata, taakkulu nerisassaanatik. Ukiorpassuarni piniartuusimasoq oqaluttuarpoq ajornartorsiut tamanna annertusiartortoq.
- Pingaartumik oktobrip qaammataani tuttut napparsimasut pisarineqallattaapput. Tuttunniarneq aallartimmat tuttut kusanartorpassuugaluarput, piffissalli ingerlanerani tuttunik napparsimasunik Niaqunngunami pisaqartartut tusarsaanerulerput, piniartoq Vilhelm Poulsen KNAPK-p Atammimmi immikkoortortaqarfiani siulersuisuniittoq oqaluttuarpoq.
Nunaqarfia tuttoqarfissuarmut Niaqunngunamut inoqarfinni qaninnersaavoq, kangerlullu taanna qinngortooq kisarsimaarfissarpassuaqarpoq. Taamaattumik tuttunniarnerup nalaani tamanna inoqaaluttaqaaq.
- Tuttunik napparsimasunik ukiut tamaasa naammattoorsisarpugut. Kisiani ajornartorsiut ukut ingerlaneranni annertusiartorpasippoq, Vilhelm Poulsen, misissuisoqartariaqarneranik isumaqartoq oqaluttuarpoq. Tamannali pilersaarutigineqanngikkallartoq Pinngortitaleriffik ilisimatitsivoq.
Tuttut napparsimasut pillugit Pinngortitaleriffik ukiut tamaasa aamma saaffigineqartartoq, ilisimatooq Christine Cuyler oqaluttuarpoq, ilanngulluguli oqaatigaa, Nunatsinni tuttut ataatsimut isigalugit peqqissut. Nunattali qeqqani misissuinerni paasineqarpoq miluuffigisaminni ilanngartuisartunik tuttut uumasuaraqartut naammattoorneqartartut.
Tuttut napparsimasut pillugit sammisaq tamaat AG-mi atuaruk – linki una aqqutigalugu iserfigisinnaavat: