Piniartoq ukiuunerani umimmanniarnissap nalunaarutigineqarnera pillugu: - Naleqqutinngilluinnarpoq
Inuussutissarsiutigalugu piniartup oqaatigaa, aalisarnermut piniarnermullu naalakkersuisoqarfiup umimmanniarnissap aallartinnissaa ullunik marlunnik sioqqullugu nalunaarutigineqarnera ajornartorsiutaasorujussuusoq.
Piniartut Kangerlussuarmi ukiuunerani umimmanniarnissap aallartinnissaanut atisassatik aallaasissartillu maanna piareersarsinnaanngorpaat.
Aalisarnermut piniarnermullu naalakkersuisup Kim Kielsenip (S), februaarip 13-ianni nalunaarutigaa,
Aalisarnermut Piniarnermullu Naalakkersuisup Kim Kielsenip (S) februaarip 13-ianni nalunaarutigaa, Kangerlussuup eqqaani qulimiguulimmik qanittukkut umimmannik kisitsisoqarneratigut pisassiissutit aalajangerneqarsimasut, februaarillu 15-annit ulluni qulini umimmanniartoqarsinnaasoq.
Karl Ingemannip Maniitsumi piniartup, allat assigalugit paasivaa, ukiuunerani umimmanniarneq februaarip 15-ianni aallartissasoq – tamannali pitsaanerusariaqaraluartoq oqaatigaa.
- Ullumikkut (marlunngornermi, aaqq.) paasitinneqarpunga ullut marluk qaangiuppata umimmanniarneq aallartissasoq, umimmanniassagaangattalu ullut sisamat tallimat missaanni piareersartarpugut, piniariarnissatsinnut qamutit atortussavullu piareersarlugit.
Taamaattumik Karl Ingemannip oqaatigaa, naalakkersuisoqarfiup umimmanniarnissap aallartinnissaa ullunik marlunnik sioqqullugu nalunaaruteqarnera, aamma umimmanniarnerup taamaallaat ulluni qulini pisussaanera ajornartorsiutaasorujussuusoq. Periaaseq tamanna nutaajusoq, taassuma oqaatigaa.
- Siullermeerluta aatsaat taama ulapitsigissaagut. Uagummi aamma Maniitsumeersugut Kangerlussuarmut timmisartoqqaartussaagatta, timmisartunilu inissarsisinnaanissaq ajornakusoorsinnaasarluni. Sapaatip akunneranik siusinaarluta billetinik inniminniisaraluaratta. Taamaalilluta ukioq manna allarluinnarmik periaaseqassaagut, piniartoq oqarpoq.
