Piniartunut ikiorsiissutit: Pinasuartumik ikiorneqarnissamik qinnuteqartoqarsinnaalerpoq
Aningaasaqarnermut ataatsimiititaliap akuersissuteqarneratigut aningaasat 1 million koruunit nalinginut piniartunit, silap pissusaata allanngorneratigut eqqornerlugaasunit qinnutigineqarsinnaalerput. Aalisarnermut piniarnermullu naalakkersuisoqarfimmit ikiorneqarnissamut qinnuteqarfissat kommuninut ataasinngornermi nassiussuunneqarput.
Piniartuuvit silallu pissusaata allanngorneranit eqqornerlugaasunut ilaavit? Taava maanna periarfissaqalerputit immikkut ittumik Namminersorlutik Oqartussanut ikiorneqarnissannik qinnuteqarsinnaalerlutit.
Tamanna pisinnaalerpoq konto pingaarneq 51.01.04, aallarteqqinnissamut tapiissuteqartarneq, ukiumut 3 millioner koruuuninik aningaasaliiffigineqartartoq aqqutigalugu.
Paasinarsimmammi piniartut ajunaarnersuartut ittumik eqqugaasut isertitaarutivissimasut, Naalakkersuisut aningaasanut inatsimmi kontot periarfissaasinnaasut misissortillugit aallartinnikuuaat, taamaaliornikkut inatsisitigut tunngavilimmik ikiorsiisinnaaneq ammaanneqarniassammat. Pingaartumik matumani pineqarput piniartut nunatta avannaarsuaniittut ukiullu sikuata takkutinngitsoorneratigut eqqornerlugaarujussuartut.
Misissuisitsinermi paasineqarpoq aningaasat 3 millioner koruuniniit 1 million krouunit sinnilaarlugit kontomi pineqartumi, aallarteqqinnissamut ikiorsiissutini ukioq manna sinnerussimasut.
Aningaasat taakku ullumikkumiit pingaartumik piniartunut silap pissusaata allanngornerata kingunerisaanik eqqugaasunut atugassiissutigineqarlutik qinnutigineqarsinnaalerput, tassa piniartunut isertitaqarnermikkut annaaasaqarujussuarsimasunut tunngatitaallutik.
Ole Kristensen oqiliallappoq: Terianniannguilluunniit pamiui periarfissaajunnaaruttortut
Sermitsiaq.AG-mit siusinnerusukkut allaaserivarput Savissivimmi piniartut ajunaarnersuartut ittumik nalaataqartut isertitaarutivissimasullu, allaaserisamilu tassani Savissivimmi aalisartut piniartullu siulittaasuat, Ole Kristensen oqaluttuarpoq novemberip aallartilaarneranili piniartut isertitaarutivissimasut.
- Assut nutaarsiassaq uagutsinnut tusarluarnarpoq. Tassami manna tikillugu tamaviaarnikooqaagut ilaquttavut nerisassaqartinniarsaralugit. Terianniannguilluunniit pamiunnguisa tuninerisigut isertitaqalaartarnerigaluarput periarfissaajunnaareernikuuvoq, Ole Kristensen qisuariarpoq.
Savissivik qeqertami inissisimavoq, pissusissamisut pisoqartuuppat qeqertaq taanna ukiup sikuanit unguneqarsimassagaluarpoq, taamaanneranilu piniartut qimussimik puisinik piniariarsinnaasaraluarput, namminneq neqissaqarlutik amiilu tunisinnaallugit imminnut pilersorsinnaasaraluarlutik. Tamannali ukioq manna periarfissaanngilaq, tassami ukiup sikua takkutinngitsoorpoq imaannarsuullunilu, taamaammallu sunut tamanut periarfissaqaratik mattussaaqqapput.
Amigarsisoqassappat Naalakkersuisut qinnuteqaqqinnissaminnut piareersimasut
Aningaasaqarnermut akileraartarnermullu Naalakkersuisoq, Erik Jensen (S) erseqqissaavoq aningaasat taakku 1 million koruunik annertussusillit amigassagaluarpata, pisariaqartitsinerlu annertunerussappat aningaasanik qinnuteqaqqinnissaminnut piareersimallutik:
- Soorunami periarfissaq ammaanneqartoq qanoq ineriartornersoq, tassa immikkut ittumik aalsiartunut piniartunullu silap pissusaata allanngorneranit eqqugaasunut ikiorsiisoqarnerata ineriartornera Naalakkersuisunit eqqumaffigissavarput. Neriuutigaarput aningaasat naammassasut, taamaattorli sillimavugut piareersimallutalu pisariaqartitsineq annertunerussagaluarpat Inatsisartunut, aningaasaqarnermut ataatsimiititaliaq aqqutigalugu qinnuteqassalluta, Erik Jensen Sermitsiaq.AG-MUT nassuiaavoq.
Taamaalilluni Naalakkersuisunit, Inatsisartut aningaasaqarnermut ataatsimiititaliaata akuersissuteqarneratigut, ilaqutariinnut meerartalinnut 5 millioner koruunit kiisalu piniartunut 1 million koruunit immikkut ittumik ikiorsiissutigineqarput.