Piniartut nunalerisunngussappat?

Nunatta kujataani kiatsikkiartortillugu naatsitsineq periarfissaqarnerujartorpoq. Sulili nunatsinni tunisassiat inuussutissat avataaneersut akiinut unammillersinnaanngikkallarput. Taamaattoq tulluussimaanermik kalaallillu kinaassusaannik pilersitseqataapput.
Nunarsuarmi silaannaap kissakkiartornera Kalaallit Nunaata kujataanik kiannerulersitsivoq. Taamaalilluni nunanerinermi periarfissat annertusipput, ullumikkut nersussuaateqartoqarluni, savaateqartoqarlunilu, natsiaanik, salatinik naasunillu naatitsisoqartarluni. Sumiiffinni arlalinni nunalerisut narsaatit ukiut 1000-t matuma siornagut qallunaatsiaanit nasaatigineqarsimasut ujaraajakkat atulersimavaat. Tunisassiornerli imminut akilersinnaanngilaq, pisortanit taperneqartarneq annertulluni, tunisassiorneqnunami pisariaqartitsinneqartut 2 procentiinnaralugu pitsaassuserlu nikerarluni.

Nerisassat kalaallit kinaassusaannut pingaaruteqarput. Ukiuni 100-nit sinneqartuni kalaallit nerisassaat tassaanerusimapput kalaalimerngit , tassalu puisi, arferit, aalisakkat timmissallu, inuussutissanik avataaneersunik ilallugit. Ullumikkut nunalerineq aqqutigalugu kalaalimerngit amerliartulersimapput taamaalillutik aamma kalaallit nerisassaqarnikkut kulturiannut kinaasussaannullu pingaaruteqarlutik.

Ullumikkut kujataani nunalerinermik inuussutissarsiuteqartut 50-t missaannipput. Imminut pilersulernissamut aqqut suli takeqaaq, nunap pisariaqartitai aallaavigalugit naalakkersuinikkullu piumassuseqartumik periusissiorlunili iliuuseqarnikkut kalaallit inuussutissiaat pitsaasut niuerutigineqarsinnaalissallutik. Tassaasinnaapput inuussutissat ulluinnarni nerineqartartut aammali tunisassiat pitsaalluartut mamartuliassallu nunanut allanut tunineqartussat. Nunalerineq attanneqarsinnaasoq usorsisimaarnermik kiffaanngissuseqarnermillu nukittorsaassaaq, immaqalu tamanna nammineerluni inuussutissanik tunisassiornerup iluaqutiginerpaassavaa.