Pinngitsaaliinerit sisamat weekendimi nalunaarutigineqartut
Weekendimi kinguaassiutitigut pinngitsaaliinerit sisamat nalunaarutigineqarput, nalinginnaasumiillu taakku amerlapput, Kalaallit Nunaanni Politiit taama oqaluttuarput.
![Kalaallit Nunaanni Politiit illoqarfinni sisamani weekendimi pinngitsaaliisoqarneranik nalunaarfigineqarput. (Assi toqqorsivimmit)](https://image.sermitsiaq.ag/111338.webp?imageId=111338&width=960&height=518&format=jpg)
Weekendimi qaangiuttumi Kalaallit Nunaanni Politiit kinguaassiutitigut pinngitsaaliisoqarneranik sisamanik nalunaarfigineqarput. Pinngitsaaliinerit Tasiilami, Ilulissani, Sisimiuni Nuummilu pisimapput.
Kalaallit Nunaanni Politiini misissuinermik aqutsisup, politikommissæri Malik Sandgreenip, weekendimut nalinginnaasumut sanilliullugit taakku amerlasut ilisimatitsivoq:
- Weekendit tamaasa sisamanik pinngitsaaliisoqarneq ajorpoq, kisianni ukiup ataatsip ingerlanera isigalugu, inuit imigassartorsimatillugit weekendini nakuusertoqarneranik pinngitsaaliisoqarneranillu amerlanerusunik nalunaarfigineqartarpugut.
- Ilaatigut suliarpassuarnik pinngitsuusaarluni atoqatiginninniartarnerit takusarpagut, tassani pinerluuteqartoq inummik aalakoortorujussuarmik sinilersimasumillu pinngitsaaliisarpoq, Malik Sandgreen oqarpoq.
2022-mi nunatsinni pinngitsaaliinerit 248-t nalunaarutigineqarput. Politiit ulluni sorlerni nalunaaruteqartarnerit pisarnersut takusassiamik suliaqarsimapput, tassanilu tallimanngorneq, arfininngorneq aamma sapaat ullut sinnerinit qaffasinnerusumik inissisimapput:
![Pinngitsaaliinerit sisamat weekendimi nalunaarutigineqartut](https://image.sermitsiaq.ag/540414.webp?imageId=540414&width=960&height=584&format=jpg)