Pipaluk Lynge-Rasmussen avatangiisit pillugit suliaqassalluni atorfimmini aallartippoq
WWF Kalaallit Nunaanni inuiaqatigiinnik suleqateqarnerorusuppoq. Plastic Not So Fantastic-imik nunatsinni pilersitseqataasoq, innuttaasut avatangiisertik pillugu isummersornerannik paasisaqarnerunissamut maanna suleqataalerpoq.
Inatsisartuni ilaasortaasimasoq Facebookimilu Plastic Not So Fantasticimik pilersitseqataasoq, Pipaluk Lynge-Rasmussen WWF Kalaallit Nunaanni sulilerpoq.
Innuttaasut najukkaminni avatangiisertik pillugu suut soqutigineruneraat suliffigilikkamini paasiniartussaagaa, WWF Kalaallit Nunaat tusagassiorfinnut nalunaaruteqarluni allappoq.
- Pipaluk Lynge-Rasmussen WWF Kalaallit Nunaanni Nuummiittumi suliniutinut aqutsisuussaaq, taamaasillunilu inuiaqatigiinni plastikimik ataasiaannaq atuinerup annikillisarnissaanut suliniutini WWFip suliaminik ingerlatsinerani suleqataasinnaanngorpoq, WWF Kalaallit Nunaat allappoq.
Suliniut nangillugu Qaqortumi septemberimi ingerlanneqartussanngorpoq, tassani Hollandimiit Wagening University and Researchimi ilisimatusartut peqatigalugit plastikkit eqqakkat misissorneqassallutik.
Plastikkit eqqakkat akiorlugit
Pipaluk Lynge-Rasmussen plastikkimik atuinikinnerulernissamik, aammalu plastikip avatangiisinut ulorianassusaa pillugu ukiuni arlaqalersuni oqariartuuteqartareerpoq. Inatsisartunut qinigassanngortikkami piujuaannartitsinissaq plastikkimillu atuinikinnerulernissamik suliniuteqarnissaq annertuumik suliniutigai.
Inatsisartuni siulittaasoqarfik aasaq manna qinnuteqarfigaa Inatsisartunit tunuarnissani pillugu, avatangiiseq pillugu sulineq aallunnerujumallugu.
- Pipaluk Lynge-Rasmussen ip WWF Kalaallit Nunaanni allaffeqarfitsinni atorfinitsinnerata, kalaallit oqaloqatigisinnaanerisa periarfissaq annertusivarput, kalaallillu avatangiiseq pinngortitarlu pillugit suut soqutigisarineraat paasiniarsinnaanngorlutigu, Allan Peter Olsen, WWF Kalaallit Nunaanniittumi aqutsisoq oqarpoq.
- Aamma Pipaluup plastikinik eqqakkat pillugit ilisimasai naapertorlugit, ukiorpanni suliagut Kalaallit Nunaanni pilersaarutini pisussanilu nukittorsaasuussalluni, oqarpoq.
Pipaluk Lynge-Rasmussen Nuummi najugaqarpoq marlunnillu meeraqarluni. Ilisimatusarfimmi kultur aamma inuiaqatigiit oqaluttuarisaanerat pillugu kandidatitut ilinniarsimavoq.
WWF Kalaallit Nunaat nunatsinneersunik pingasunik, Nuummi sulisunik maanna peqalerpoq.