Pisinnaatitaaffigummi?
Siumumiit paaserusunneqarpoq naalakkersuisut qanoq iliulersaarnersut puisit amiinik tunisassianik eqqusseqqusiunnaarnermi nunat inoqqaavisa pisinnaatitaaffiisa unioqqutinneqarnerat pinngitsoortinniarlugu
Siumup siulittaasua Aleqa Hammond qanittukkut KNAPK-mi siulittaasup Leif Fontainep kajumissaarutaa qisuariarfigaa.
Leif Fontaine isumaqarpoq EU-mut puisit amiinik tunisassianik eqqusseqqusiunnaarneq FN-imi nuat inoqqaavisa pisinnaatitaaffiinik arlalinnik unioqqutitsinerusoq.
Taamaattumik Aleqa Hammond naalakkersuisunut allagaqarpoq.
- KNAPK-p naalakkersuisunut ammasumik allakkamini maluginiaqquaa FN-imi nunat inoqqaavisa pisinnaatitaaffiini artikel 3, artikel 5, artikel 8,2 ab, artikel 20, artikel 32 aamma artikel 46 2,3 unioqqutinneqartut. Taamaattumik naalakkersuisut apererusuppakka naalagaaffeqatigiinnerup iluani naalakkersuisutut qanoq iliorniarnersut?
Siumup siulittaasuata saaffiginninnermi tunngavilersuutigaa KNAPK-p oqariartuutaa pimoorukitsik.
Leif Fontaine naapertorlugu nunatsinni puiseqassuseq imaani umassusilinnik ajoquseerujussuarsinnaasoq, Danmarkillu pisinnaasani tamaat inuit pisinnaatitaaffiisa malinneqarnissaat sulissutigisariaqarlugu, ilaatigut EU-mut puisit amiinik tuniniaanikkut.