Pisinnaatitaaffiit pillugit siunnersuisoqatigiit nutaanik ilaasortaqalerput
Inuit Pisinnaatitaaffii pillugit Siunnersuisoqatigiit Inatsisartunit toqqarneqartunik tallimanik nutaanik ilaasortaqalerput.
![Pisinnaatitaaffiit pillugit siunnersuisoqatigiit nutaanik ilaasortaqalerput](https://image.sermitsiaq.ag/166922.webp?imageId=166922&width=960&height=518&format=jpg)
Inuit Pisinnaatitaaffii pillugit Siunnersuisoqatigiivini ilaasortanik tallimanik nutaanik toqqaasoqarpoq. Ilaasortat ukiuni sisamani atuuttussat Inatsisartuniit toqqarneqartarput, ungasinngitsukkullu inissititerfiusumik ataatsimiittoqartoq, siunnersuisoqatigiit tusagassiuutinut nalunaarummi oqaluttuarput.
Qivioq Løvstrøm siulittaasutut qinigaaqqippoq, suliallu ingerlateqqinneqarniassammata neriuppoq siunnersuisoqatigiinnut aningaasaliisoqassasoq:
- Nunatsinni inuit pisinnaatitaaffiinik nakkutilliinerup saniatigut, Siunnersuisoqatigiit suliaasa ilaat annertuut qaammarsaanermut tunngasuupput. Innuttaasut pisinnaatitaaffitik
ilisimanngikkunikkit, eqquutsinneqarnissaat piumasarisinnaanngilaat.
- Qaammarsaanermi suliaq pitsaasoq maannamut ingerlatarput, Nunanut Avannarlernut aningaasaliissutit iluaqutigalugit kivissinnaasimavarput. Taakku 2021-imiit 2024-imut aningaasaliissutaapput, soorunalumi suliniutit tamanut iluaqutaasussat sapinngisamik nanginnissaannut periarfissinneqarnissarput neriuutigaarput, siulittaasoq Qivioq Løvstrøm, oqarpoq.
Ilaasortat nutaat tassaapput: Niels Skifte, Arnanguak Schmidt, Tukumminngiaq Olsen Lyberth, Ulunnguaq Markussen aamma Christina Johnsen
Ilaasortat maannakkumut tunuartut tassaapput: Katrine Nathanielsen, Arnajaaq Lynge, Sara Olsvig, Gujo Thorsteinsson aamma Lise Mørup Dalsgaard.
Inuit Pisinnaatitaaffii pillugit Siunnersuisoqatigiit maanna ima isikkoqalerput:
- Siulittaasoq: Qivioq Løvstrøm (inuit pisinnaatitaaffii pillugit soqutigisanut allanut sinniisuusoq)
- Siulittaasup tullia: Tukumminngiaq Olsen Lyberth (nunat inoqqaavisa pisinnaatitaaffii pillugit suliniaqatigiiffinnut pisortanut attuumassuteqanngitsunut sinniisoq)
- Siunnersuisoqatigiinni ilaasortat: Arnannguak Schmidt (meeqqanut inuusuttunullu tunngatillugu suliniaqatigiiffinnut pisortanut attuumassuteqanngitsunut sinniisoq)
- Christina Johnsen (eqqartuussiveqarnermut inatsisitigullu illersugaanermut sinniisoq)
- Niels Skifte (innarluutilinnut tunngatillugu suliniaqatigiiffinnut pisortanut attuumassuteqanngitsunut sinniisoq)
- Ulunnguaq Markussen (ilinniartitaanermut ilisimatusarnermullu sinniisoq)
- Carl-Christian Puju Olsen (inuit pisinnaatitaaffii pillugit soqutigisanut allanut sinniisoq)
- Kaj Kleist (inuit pisinnaatitaaffii pillugit soqutigisanut allanut sinniisoq)
- Daniel Thorleifsen (inuit pisinnaatitaaffii pillugit soqutigisanut allanut sinniisoq)
- Stinus Silassen (inuit pisinnaatitaaffii pillugit soqutigisanut allanut sinniisoq)