Pisortaanerup kannguttaatsuliortarsimanera pillugu suliaq nangeqqinneqartoq
KNI-mi pisortaanerusimasup Peter Grønvold Samuelsenip eqqartuussaaneranik suliaq ullumi nangeqqinneqassaaq.
Sisimiut Eqqartuussiviata Peter Grønvold Samuelsenip eqqartuussaanissaa ullumi sisamanngornermi suliaralugu aallarteqqissavaa.
KNI-mi pisortaanerusimasoq pisortaanerunermini sulisunut arlalinnut kannguttaatsuliortarsimasutut pissutsini tallimani unnerluussaavoq.
Unnerluussutitut allagaq naapertorlugu, pisortaanerusimasup piffissami 2016-imi januaarimiit 2021-mi februaarip tungaanut arnat assigiinngitsut timaasigut attuualaartarsimavai.
Eqqartuussinerup naammassineqarnissaanut suliamik ilisimannittunit katillugit arfineq-pingasuusunit ataatsip apersorneqarnissaa amigaataavoq. Ilisimannittoq februaarip aallartinnerani ullut eqqartuussiffiusut siulliit ingerlanneqarmata coronaqalersimagami. Ilisimannittumik allamik aamma aggersaasoqarsimavoq, taanna ullumi apersorneqassaaq.
Pisuussuteqannginnerartoq
Tamatuma saniatigut Peter Grønvold Samuelsenip inuttut pissusilersortarnera sammineqassaaq kiisalu illersuisoq unnerluussisorlu inaarutaasumik oqaaseqassallutik.
Peter Grønvold Samuelsenip illersuisuata ilisimatitsissutiginikuuaa, pisortaasimasoq pisuussuteqannginnerartoq unnerluussutigineqartunillu pinngitsuutinneqarnissani anguniarniaraa.
Eqqartuussinissaq kinguartinneqarsimavoq, siornalu decembarip qaammataata aallartinnerani ingerlanneqartussaasimagaluarluni.
Peter Grønvold Samuelsen 2021-mi martsip qaammataani pisortaanertut tunuarpoq. Tamatuma saniatigut KNI-mi uninngasuutigisat kukkusumik naatsorsorneqartarsimapput naatsorsuinermilu peqquserluttoqartarsimalluni, taakku paasisaqarfigineqarnerusinnaapput, uani.