Pisortap soraarsitaanera suliumajunnaarnermik kinguneqartoq
Kommuni Kujallermi meeqqanut inuusuttunullu tunngasutigut suliaqarfinni sulisut pisortap soraarsitaanera naammaginagu suliumajunnaarsimapput, isumaqaramik pisortaq piginnaasaqarluartoq
Kommune Kujallermi meeqqanut inuusuttunullu tunngasutigut suliaqarfinni tamani sulisut sulinerminnik unitsitsismapput. Sulisut 20-t 30-llu akornanni amerlassuseqannguatsiarput.
Ippassaq sulisunut ilisimatitsissutigineqarmat, suliffimmi pisortaq soraarsitaasimasoq suliumajunnaartoqarpoq. Sulisut isumaat malillugu pisortaq piginnaasaqarluartoq, ukiut marluk kingulliit ingerlaneranni kommunimi isumaginnittoqarfimmik ingerlalluartitsitsilersimavoq.
- Kommuni siusinnerusukkut nakkutilliisunit isornartorsiorneqarsimavoq, maannalu sulineq aaqqissuussaanerulerlunilu suliassanut malinnaasoqalersimavoq, sulisut suliumajunnaartut ilaat kinaassutsiminik isertuussisoq oqarpoq.
Sulisuttaaq misigisimapput pisortat pineqartumik toqqaannartumik inuttarsiuisut, pisortammi sulisunut sianeqattaarsimapput suliffimmi pisortaq naammagittaalliuutigineqarsimanersoq paasiniarlugu.
Pikkorippallaarsimanerpoq
- Maanna immitsinnut aperisarpugut, pisortaq suliamut pikkorippallaarsimanersoq, sulisoq ataaseq oqarpoq.
Sulisut nukillaajummersimanerannut aamma pissutaavoq, sulisut ikinnerpaamik 15-it kommunimi isumaginninnermut pisortamik kiisalu pisortap tullianik naammagittaalliuuteqarsimanerat. Ilisimatinneqarsimapput naammagittaalliuutaat iliuuseqarfigineqarnianngitsoq.
Sermitsiaq.AG-mit Kommuni Kujalleq oqaaseqartinniarlugu attavigineqarsimavoq, sulili akissuteqartoqanngilaq.
Aqqissuisoqarfimmit sulisoq kinaassutsiminik isertuussisioq kinaanersoq ilisimaneqarpoq.