Pisortaq: Maskiinap ajoquteqarnera apornermut pissutaavoq
Marlunngornermi Nuuk Water Taxip angallatitaava Nuummi talittarfeqarfimmi nunamut aporpoq. Angallatip koblingia pisumut pissutaasoq, pisortaq oqaluttuarpoq.
Nuuk Water Taxip angallatitaava Aviaq Ittut marlunngormat sissiukkamut Nuummi talittarfeqarfimmi aporpoq.
Videomi innuttaasumit takunnittumi immiunneqartumi tamanna takuneqarsinnaavoq, taassuma immiussaq kingorna Facebookikkut siammarterpaa.
Videomi Aviaq Ittuup umiatsiaq mikinerusoq aporaa takuneqarsinnaavoq, kingornalu Nuummi amutsiviup eqqaanut nunamut aporpoq.
Sissiukkami ujaqqat apulerneranni angallat sanguvoq, taamaakkaluartoq aporpoq.
Inuttat tupaqqasut
Angallaat Nuuk Water Taxip pisiareqqammerpaa, taanna 36-nik ilaasoqarsinnaavoq. Nuummut tikeqqammerpoq, tassanilu annertuumik aserfallattaaliorneqartussaavoq.
Ajutoornermut atatillugu angallat imaluunniit inuttat annerusumik ajoqusersimanngitsut, pisortaq Anders Lykke Laursen Sermitsiaq.AG-mut oqaluttuarpoq, kiisalu maskiinamik ajutoorneq pissutaanerarpaa:
- Inuttat tupaqqapput aammalu soorunami ajuusaarput.
- Koblingia ajortippoq, taamaalillunilu angallat kinguporsorsinnaajunnaarpoq, Anders Lykke Laursen, Sermitsiaq.AG-mut mailikkut allappoq.
Kalinneqartoq
Suliffeqarfik Masik sukkasuumik ornigulluni angallat kalikkiartorsimagaa, pisortaq nangilluni oqaluttuarpoq, maannalu pilersaarutaasoq malillugu amutsivimmi suliarineqartussanngorpoq.
Sulisut pisumut ilaasut ikiorniarlugit, pisortaq oqaluttuarpoq:
- Soorunami inuttavut nammineerlunga isumagissavakka, tamatta iluamik ingerlariaqqinnissarput qulakkeerlugu, Anders Lykke Laursen oqarpoq, taanna pisoq pillugu allanik oqaaseqarnianngilaq.
Pigaartut pisortaat: Pisoq misissuiffigaarput
Politiit pigaartuisa pisortaat Jørgen Madsen, pisoq pillugu marlunngornermi ualikkut nalunaarfigineqarsimallutik oqaluttuarpoq:
- Suliaq misissorparput, inunnillu suli apersuinissarput amigaatigaarput. Taamaattumik suli oqaaseqarsinnaarpianngilagut, Jørgen Madsen, pingasunngornermi ullaakkut oqarpoq.
Imarsiornermik Aqutsisoqarfik pisoq pillugu ilisimatinneqarsimasoq, pigaartut pisortaat nangilluni ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...