Pisortatigoortoq: Kim Kielsen nunatsinni aqutsisunngorpoq

Siumup siulittaasua 48-nik ukiulik Kim Kielsen, Inatsisartunut 2005-imi qinigaaqqaartoq, maanna pisortatigoortumik Naalakkersuisut siulittaasuattut ivertinneqarsimalerpoq.

Tamanna tallimanngornermi nalunaaqutaq 12.30 pivoq Inatsisartut inissititerlutik ataatsimiiinneranni Naalakkersuisuutitaqalersut 16-inik taasineratigut, illuatungiliuttut 13-it taaseqataanngitsut. Taamaalilluni Kim Kielsen Namminersorlutik Oqartussat eqqunneqarnerata kingornanit Naalakkersuisunut siulittaasunngortussat pingajussarilerpaat.

Illuatungiliuttuni 14-iusuni ilaasortaq ataaseq taaseqataanissaminut periarfissaarummat, Inatsisartut isumaqatigiillutik Naalakkersuisuutitaqartuneersoq ataaseq taaseqataanngilaq.

Atuaruk: Pisortatigoortoq: Aajuku Naalakkersuisunngortut

Atuaruk: Paasissutissiineq: Inatsisartuni ilaasortaalersut

Kim Kielsen, tunngaviusumik umiartortutut inuussutissarsiuteqarsimasoq, kingornali politiitut ilinniagaqartoq, politiinit sulinngeqarpoq 2003-mi meeqqanut inuusuttuaqqanullu ajornartorsiutilinnut sullissiniarluni.

Kisianni 2005-imi Inatsisartunut qinigaavoq. Taamanermiilli marloriarluni Naalakkersuisuni ilaasortaasimavoq. Siullermik ineqarnermut, attaveqarnermut aatsitassanullu naalakkersuisuuvoq 2007-imiit 2009-imut Hans Enoksenip Naalakkersuisunut siulittaasuunerata nalaani, aappassaanillu avatangiisinut pinngortitamullu naalakkersuisuuvoq 2013-imiit 2014-ip tungaanut.

Naalakkersuisuuffik kingulleq pissarsiaraa Partii Inuit Aleqa Hammondip Naalakkersuisuutitaaniit 2013-imi ukiakkut anisitaammata, tamanna pivoq Partii Inuit aatsitassanik uranitalinnik piiaanngilluinnarnissamik aalajangiussap atorunnaarsinnissaanut tapersersuinngereertullu.

Atuaruk: Johansen pisortatigoortumik Inatsisartunut siulittaasunngorpoq

Qinersinermi qinerneqarnerpaat tulliusoq
Kim Kielsenip aamma Aleqa Hammondip Siumup siulittaasuatut 2014-imi oktobarimi kinguaarpaa, tamannalu pivoq Aleqa Hammondip nunatta karsianik nammineq inuttut 106.363,27 koruuninik atuisarsimanera qulaarneqareersorlu.

Aleqa Hammondip nunatta karsianik atuisarsimanerata qulaarneqareernerata Aleqa Hammondillu Inatsisartunit septembarip 30-anit sulinngifeqalernerata kingornanit Kim Kielsen Naalakkersuisunut siulittaasuungallartutut inissippoq. Kisianni naluneqanngitsutut Inatsisartunut qinersinissaq oktobarip aallaqqaataani Naalakkersuisut uppimmata suaarutigaa.

Kielsen Inatsisartunut qinersinermi qinerneqarpaanut tulliulluni novembarip 28-ani inissippoq, taamani inuttut 4.612-inik qinerneqarami.

Atuaruk: Johansen Inatsisartuni siulittaasunngoqqissaaq

Atuaruk: Inatsisartut inissitsiternerminnut ataatsimiinneranni silarlussaaq