Pissuserissaannginnerup malitsigisaanik Inatsisartuni silaannaq nillertoq
Inatsisartuni ilaasortaq, Jens Napaattooq (N) isummaminik nittarsaassivoq: - Mimip meeqqatut oqaaqqissaagassatut pissusilersorfigivaatigut meeqqagullu Inatsisartut gangersuiniit peeqquai. Pissutsit taamaattut atuutsillugit sulisinnaanerput killilersorneqarpoq, Napaattooq Sermitsiaq.AG-mut oqarpoq.
Naleraq pillugu partiit sinnerisa sisamat Inatsisartut siulittaasoqarfiannut naammagittaalliorneranni Jens Napaattooq assersuutitutut atorneqarpoq.
Naammagittaalliuut naapertorlugu Jens Napaattooq killissaminik qaangiisutut, nipiliortutut aammalu nikanarsaasutut Bentiaraq Ottosen (A)-mut pissusilersorsimaneragaavoq ulloq 14. oktober.
- Inunnguutsinnik nipituujuvunga, oqalukkaangamalu oqaluinnakassattunga ilaasa paasisarpaat nilliasunga naqqissuisungalu, taamaattoqanngilarli, isumapiloqarnanga inuttut pissusera atuinnartarpara, Jens Napaattooq Sermitsiaq.AG-mut oqarpoq.
Meeqqat partiit torsuusaanniit peerneqassapput
Paarlattuanilli Jens Napaattuup naammaginngilluinnarpaa, nammineq Inatsisartunilu ilaasortat allat partiinit allaneersut tulleriaallugit Inatsisartut siulittaasuannut Mimi Karlsen (IA)-mut oqaloqatigineqassallutik aggersarneqarsimanertik pillugu:
- Inatsisartut siulittaasuannit ataatsimeeqatiserineqarlunga aggersarneqarpunga, naluara sooq kisima ataatsimeeqatiginiarneraanga, taamaattorli ingerlaannaq malugivara ataatsimiinnitsinnut atatillugu suminermilluunniit pappiaraqanngitsoq, aamma malugivara atorfilittanik peqataasoqanngitsoq. Ernera pillugu apeqqarissaarpaanga, ernera ulluinnarni allaffinniittarpoq piffissami kingullermi kisimeeqatigigakku aappara Danmarkimiikkami ilinniarnerminut atatillugu.
- Qinnuigineqarpunga ernera pillugu aaqqiissutissarsiussasunga, allaffinnut tikilluaqqusaajunnaarsimammat, assut tupinnarpoq taamak pineqarneq aamma paasivara kisima taamak pineqarsimanngitsunga, Inatsisartunili ilaasortat allat arlallit uattulli piuaffigineqarsimapput meeqqat suliffitsinnit peerneqassasut, tamanna siornatigut nalaatinngisaannarnikuuarput, assullu kissaammissutigivara pakatsissutigalugulu.
Pisoq pillugu Napaattooq ima pakatsisimatigaaq allaat ernini angerlaqatigiinnarniarlugu isumaliuteqalersimalluni.
- Nalunngilara allat uattulli pineqarsimasut arlaliusut uattulli angerlaannarnissaminnik eqqarsaateqartut.
Aperineqarami naammaginngisanik nalaataqarnermi suliffik qimaqattaarlugulu orneqattaaginnagassatut isigineraa, taamaannginneraavoq nalunnginnerarpaalu aallaannassaguni akissarsiaminik ilanngaatsissinnaalluni aammalu angalanissani nammineq akilertariaqarsinnaallugu, taamaattoqassappallu piareersimanerarpoq.
Naak taakku Inatsisartut meeqqanut inussiarnersut?
Jens Napaattooq apeqqusiivoq Inatsisartut siulittaasoqarfianni susoqarnersoq. Taanna isumaqarpoq Inatsisartut siulittaasuat, Mimi Karlsen sinnilimmik naalagaaniarpallaalaartoq aammalu Inatsisartuni ilaasortanut meeqqat oqaaqqissaagassatut pissusilersorfiginnittoq:
- Inatsisartuni siulittaasortaat oqaannaraanni tamarmik neriorsuuteqartarput ilaqutariinnut meerartalinnut suliffik kajuminnarnerussasoq, tassami Inatsisartuni ilaasortatut ulluinnagut aggerfippullu qimallugit meeqqagut assigiinngitsunik pissuteqarluta ataatsimiigiaraangatta ilagisariaqartarpagut.
Taannali aamma nassuerpoq Inatsisartut siulittaasuat ajornartorsiutinik taamaattunik nalaataqarnermi aaqqiiniartussaasoq, taamaattorli pitsaanerusumik suliap ingerlanneqarnera pisinnaagaluartoq uparuaavoq.
- Inatsisartut siulittaasoqarfiat ataqqilluinnarpara, taamaattorli matumani Mimip periarnera kukkunerusoq isumaqarpunga.
Inatsisartut Siulittaasuat, Mimi Karlsen (IA) matumani Napaattuumit isornartorsiorneqarnera pillugu oqaaseqartinniarlugu Sermitsiaq.AG-mit sulissutigaarput.