Pisuut akileraarnerulernissaat akuerineqanngilaqRigmandsskatten skudt ned
- Allaanerusumik akileraarutit qaffaaffigineqarsinnaapput, Aningaasaqarnermut Naalakkersuisoq Aleqa Hammond, Siumut, oqarpoq.
Naalakkersuisut Inatsisartullu amerlanerussuteqarluartut pisuut akileraarnerulernissaannik siunnersuut marlunngornermi ualikkut akuerinngilaat.
Inatsisartuni ilaasortaq Josef Motzfeldt siunnersuuteqarpoq pisariitsumik allaffissornarpallaanngitsumik aningaasarsiaqqortunerit akileraarnerusalernissaannik.
Kisermaaq 400.000 koruuninik amerlanernik ukiumut aningaasarsialik aappariillu 800.000 koruuninik amerlanernik aningaasarsiallit, immikkut, aningaasat pineqartut sinnerneqaraangata, aningaasarsiaminniit 10 procentinik akileraarnerusalissasut.
Josef Motzfeldt isumaqarpoq inuit taama aningaasarsiaqartut inuuniarnermikkut akornutiginavianngikkaat.
Siunnersuut naapertorlugu 40.000 koruuninik qaammammut aningaasarsialik 285 koruuninik akileraarnerusalissaaq.
Inuit qaammammut 50.000 koruuninik aningaasarsiallit qaammammut 1.300 koruuninik akileraarnerusalerlutik.
Aningaasarsiaqqortunerit akileraarnerusalernissaat atuutilerpat, Josef Motzfeldtip allassimasaa naapertorlugu landskarsi immikkut ukiumut 92,5 millioner koruuninik isertitaqartassagaluarpoq.
Atassut aningaasarsiaqqortunerit akileraarnerusalernissaannik tusaarusunngilaq. Siumup inummut ilanngaat ilanngaallu aalajangersimasoq kommuninullu ataatsimoortumik akileraarut qaffaaffigissallugit orniginartinneruvai, soorlu 2005-mi taamaaliortoqartoq.
Taamaalilluni pisuut akileraarnerusalernissaat pinngitsoorpoq.