Polar Nanoq
Polar Nanormi inuttat Birnap ilaqutaanut misiginneqataapput
Inuttat nalunaaruteqarnerminni Birna Brjánsdóttirp ilaqutaanut misiginneqataanertik oqaatigaat. Tamatuma saniatigut sapaatip akunnerani kingullermi qanoq misigisimaneritsik allaatigaat.
Sapaatip akunneq kingulleq ingerlasoq Polar Nanormi inuttanut misigisaq tujorminarlunilu tupannarsimavoq.
Tamanna nalunaarummi nassiussaanni atuarneqarsinnaavoq.
Misiginneqataanertik oqaatigigiaat
Birna Brjánsdóttir toqungasoq toqunneqarsimagunartorlu ippassaq paasinarsimmat sunnerteqqapput.
- Islandimi pisoq alianartoq Polar Nanormi inuttat tamatta annertuumik attortissimassutigaarput. Pisumut eqqugaassimasut ilaqutaasullu tamarmik misiginneqatigaavut, inuttat allapput.
- Aamma tamatta pinngitsoqarata neriuppugut susoqarsimanera paasilertorneqarlunilu pinerluuteqarsimasut akisussaatinneqassasut.
Atuaruk: Inoqammik pingaartitseriasaarneq
Misigisaq sakkortooq
Ullunilu kingullerni inuttat qanoq iliussanerlutik nalornissutigisimaqalutik erseqqissarpaat.
- Inuttaasugut tamatta sakkortuumik nalaanneqarsimasutut misigisimavugut, aamma ulluni kingullerni nalaatavut unamminarsimapput. Nalornissutissaqarsimaqaagut aamma inuttat arlallit periarfeerunneqartup qanigisaanniit allaffigineqarsimagaluarput, kisianni avammut nalunaaruteqaqqusaassimanngilagut piffissarujussuullu ingerlanerani susoqarneranik ilisimasaqarsimanata, tamanna allaqqavoq.
Inuttat ilaquttatik sulisitsisortillugu qujamasuutigaat, kiisalu psykoterapeuti aamma kajumissutsiminnik ikiuussimasut qujaffigalugit.
Atuaruk: Vittus: Pisoq ilungersunarpoq
Islandermiunit inussiarnisaarfigineqartut
Islandimi illoqarfimmi maanna atianik taaneqanngitsumiipput. Ataasiakkaalli pisumit sunnerteqqavallaarnertik pissutigalugu angerlartariaqarsimapput.
- Nalunngilarput pisoq misigisimasarpullu sivisuumik qaangerniartussaallutigu, nangillutik allapput.
Taamaakkaluartoq qaamanertaqalaarpoq.
- Naak pisoq ilungersunaraluartoq naggasiullugu oqaatigerusupparput, Islandimiut tamarmik pisarnermisut inussiarnernerat tikilluaqqusinerallu allanngorsimanngimmat, nalunaarummi naggasiipput.
Nalunaarut tamakkiisoq allaaserisap talerpiata tungaani linkimi atuarneqarsinnaavoq