Polar Nataarnaq Kujataani ilulissamut aportoq: Inunnik ajoqusertoqanngilaq
Polar Seafoodip kilisaataa Polar Nataarnaq juulip qiteqqunnerani Frederikshavnimit aallaramili ajornartorsiutinik nalaanneqaqattaarsimavoq. Kilisaat arfininngormat ilulissamut aporpoq maannalu Savalimmiunut utersimalluni ajoqusernerit iluarsaatsikkiartorlugit.
Polar Seafoodip kilisaataa Polar Nataarnaq Kujataani arfininngormat ullup-qeqqanngitsiartoq ilulissamut aporsimavoq. Polar Seafoodip pisortaa, Bent Salling, naapertorlugu, apornera pisimavoq Frederikshavnimi amutsivimmeeqqammersoq inuttat 13-it kilisaammi issimasoralugit. Tamanna Qanoruumut oqaluttuaraa.
Apornerup tupannartup nalaani qujanartumik inunnik ajoqusertoqanngilaq, kisianni Sermitsiaq.AG-p paasissutissaatai naapertorlugit, kilisaat ajoqusingaatsiarpoq. Pisortarli Bent Salling pisoq pillugu annerusumik oqaaseqarusunngilaq, apornermut pissutaasut suli misissorneqarmata.
Ukioq manna aappassaa ajoqusertoq
Polar Nataarnaq pisup kingorna Savalimmiunut uterpoq, ajoqusernerit tassani iluarsaanneqassammata.
Angalanerli kilisaammut pisimasoqangaatsiarsimavoq. Frederikshavnimit suli aallanngitsoq Danmarkimi politiit kilisaammi ikiaroornartumik hashimik 4 kiilumik nassaarput, Savalimmiunilu Thorshavnimut tikinnerani Savalimmiuni politiit ikiaroornartumik hashimik suli 4 kiilumik nassaaqqillutik.
Polar Nataarnaq angalatilluni ajutoornermut siullermeerluni akuunngilaq. Kilisaat januaarimi Royal Greenlandip kilisaataanut Akamalimmut aporpoq..