Polar Seafoodip iluatsittoq uteqqippaa: - Ilinniagaqalersitsinerput annertuumik tanngassimaarutigaarput

Polar Seafoodip ilinniartoqatigiit pingajussaat aallartippai – taamaalillunilu siulliit marluk iluatsinnerat nangillugu.

Aalisartunut inuusuttunut ilinniartitsineq ingerlataraa, aalisarnerup iluani sulinissaminnik kissaateqartunut, Polar Seafood Facebookimi taama ilisimatitsivoq.

Ilinnialertut inuusuttut 12-iupput, ilinniarnerminnilu aqumiutut maskinmesteritut aamma tunisassiorfinni pisortassatut ilinniagaqalersinnaapput. Ilinniarnermi takorluukkaminnik piviusunngortitsinissaminnut piginnaasanik ilisimasanillu pissarsiaqartussaapput.

- Ilinniagaqalersitsinerput annertuumik tanngassimaarutigaarput, Polar Seafoodimi pisortap tullia Miki Brøns oqarpoq.

Inunnik ilinniartitsisartut

Nangippoq:

- Inuusuttut tapersuisunik siunnersortinik pikkorissarnernillu ilallugit soorlu namminneq aningaasaqarnerat pillugu neqeroorfigisarpagut. Tamatuma sulisut pikkorissut pilersitseqataaffigaat – kisianni aamma inunnik perortitsisarput. Maanna holdit pingajuat aallartippoq, aamma siulliit marluttut iluatsilluassappata, taava iluarisimaassavarput

Holdit ilinniagaqartut marluk siulliit naammassisut 14-iupput. Taakkunannga qulit suli Polar Seafoodimi atorfeqarput.

Taamak amerlatigisut naammassisarneranni eqqortumik iliortoqarnera, Bent Sallingip aamma Polar Seafoodimi pisortamut tullersortaasup qularutiginngilaa.

- Inuit ilivitsutut ittut ilinniartinnissaat anguniagaraarput inunnut ataasiakkaanut inuiaqatigiinnullu iluaqutaasussat, taanna oqarpoq.

Polar Seafoodip ilinniartitaaneq ataavartumik naleqqussartuarpaa pitsaanerulersinniarlugu – aamma holdit pingajuannut taama iliortoqarpoq. Maannakkorpiaq umiarsuarmi igasussanik ilinniartitsinissaq eqqarsaatigineqarpoq. Igasut qaqutigorujussuaq eqqumaffigineqartarput , kisianni taakku pingaarutilerujussuupput. Kisianni igasoq umiarsuarmi ulluinnarni ingerlatsinermi pingaarutilerujussuuvoq, Bent Salling oqarpoq.