Polar Seafoodip pisortaa hashimik nassaat pillugit: Taamaaliortoqarsimanera inissaminiinngilaq
Polar Seafoodip kilisaataani Polar Nataarnami ikiaroornartumik hashimik annertujaanik nassaartoqarnerata kingorna Polar Seafoodimi aqutsisut pissutsinik pakatsissutiginnipput. Suliap aappaani inuttaq pisuunerminik nassuerutiginnippoq.
Aalisartitseqatigiiffimmi aalisariutit ilaata suliamut kilisaammi Polar Nataarnami sapaatip-akunnerani kingullermi Danmarkimi Savalimmiunilu ikiaroornartumik hashimik annertujaanik marlunnik nassaarfiusumut akuusimanera Polar Seafoodip pisortaata Miki Brønsip ajuusaarutigaa.
- Aalisariutaatitta tamatumunnga atorneqarsimanera sulisuttalu pikkorissut tamarmik pisumit attortisimasorujussuunerat ajuusaarutigisorujussuuarput. Uagut nammineq sulisutta ilaata kilisaammi anngiortumik eqqusseriarsimagaluarnera uggornaqaaq. Taanna uagutsinni soorunami suliffeqarunnaarsinneqarpoq, pisortaq erseqqissaavoq.
Polar Nataarnaq sapaatip-akunneri pingasut sinnerlugit amutsivimmeeqqammerpoq, pissutsillu tamatuma nakkutilliineq nalinginnaasumit suli ajornakusoornerulersissimavaa, pisortaq oqaluttuarpoq.
- Amutsivimmiinnerup nalaani inunnik 30-40-nik umiarsuarmiittoqarsinnaasarpoq, pissutsinilu taama ittuni tamakkununnga upalungaarsimaniarnissaq ajornakusoorpoq.
Miki Brøns oqaluttuarpoq, Polar Seafoodip nammineerluni akitsuuserisut amutsivimmeereernerup kingorna ornigunnissaannik ilisimatittarai umiarsuaq aallaqqittussanngoraangat ikiaroornartumik hashimik inerteqqutaasunilluunniit allanik umiarsuarmiittoqarsinnaanera pinngitsoorniarlugu.
- Uagut nammineerluta suliniuteqartarpugut sillimaniarnissamullu atatillugu iliuuseqartarluta. Takusinnaavarput suut umiarsuarmut ikineqarnerannik suli annertunerusumik nakkutilliilernissamut immaqa piffissanngorsimasoq, kisianni aqunniarnera ajornartorujussuusinnaavoq. Sisamanngorpat politiinik ataatsimeeqateqassaagut siunissami qanoq iliorsinnaanerput oqaluuseriniarlugu.
Kikkut tamarmik pasinarsarneqartut
Erseqqissaatigaa suliaq taama ittoq umiarsuarmiittunut tamanut eqquisoq.
- Savalimmiuni inuttat Thorshavnimiinnitsinni ilaquttamik ikinngutimillu naapinnissaannut aamma qilanaarsimagaluarput, taarsiulluguli umiarsuarmiittut allat peqatigalugit politiinit uninngatinneqarsimallutik. Sulisutta arlaannaannulluunniit taamatut pasinarsarneqarneq nuannersuunngilaq, erseqqissaavoq.
Siusinnerusukkut Royal Greenlandip kilisaataani aamma Royal Arctic Linep umiarsuaataasa ilaanni ikiaroornartumik hashimik aamma nassaartoqarsimavoq. Kalaallit Nunaanni nioqqutit tunineqarfigisinnaasaannik niuerfeqartuartillugu taamaattoqartassasoq, Miki Brønsip nassuerutigaa.
- Hashi sumiluunniit inissaminiittussanngilaq, inuiaqatigiinni umiarsuaatitsinniluunniit, oqarpoq.