Politi: Qaqorsaammik imertitsisoornermi politiit paasiniaassanngitsut
Politiit naliliipput meeqqerivimmi sulisut meeqqanut pingasunut qaqorsaammik ataasinngormat imertitsisoornerat pillugu paasiniaanissamut tunngavissaqanngitsoq. Kukkuluttortoqarsimasoq ilimanarneruvoq, pigaartut pisortaat oqarpoq.
Kalaallit Nunaata Politiivisa nalilerpaat Sisimiuni meeqqerivimmi sulisut meeqqanik pingasunik qaqorsaammik imertitsisoorsimanerat pillugu paasiniaanissamut inatsisitigut tunngavissaqanngitsoq.
Kalaallit Nunaata Politiivini pigaartut pisortaat, Mark Larsen Sermitsiaq.AG-mut taama ilisimatitsivoq.
- Ippassaq sumiiffimmukarpugut misissuiartorluta. Suliamilu killisiuisimalluta. Maannamut naliliivugut suliami piaarisoqarsimanngitsoq kukkuluttortoqarsimasorli, Mark Larsen oqarpoq.
Sullivinnik nakkutilliisoqarfik nalunaarfigineqarpoq
Pigaartut pisortaat ilisimatitsivoq kommunimi iliuuserineqartartut allanngortinneqarnissaanut pisariaqartitsineq aallaavigalugu, suliaq kommunimiittariaqartutut nalilerneqartoq, tamannalu politiit suliassarinngikkaat.
- Politiit tungaanniit maannakkumut pissutissaqanngilagut suliami paasiniaassalluta. Sullivinnik nakkutilliisoqarfik suliamut tunngatillugu nalunaarfigineqarpoq. Taakkulu naliliippata paasiniaanissaq pisariaqartoq, taava aatsaat politiinit paasiniaaneq nangeqqissavarput, Mark Larsen nassuiaavoq.
Meeqqat pingasut Sisimiuni meeqqerivimmi Uiami qaqorsaammik imertittoorneqarsimasut Sisimiut peqqissaavianni uninngareerlutik maanna angerlartinneqarsimapput.