Politi: Toqusoqarsimanera suli paasiniaaffigineqarpoq
Kalaallit Nunaata Politiivisa niviarsiaqqap 11-nik ukiullip toqusimaneranut atatillugu paasiniaanissartik suli pisariaqartippaat. Suliamut atatillugu angut 27-nik ukiulik pasineqarluni ulluni 27-ni tigummigallangassanngortinneqarsimavoq.
Aasianni niviarsiaqqap aqqanilinnik ukiullip toqusimaneranut atatillugu suli annertuumik paasiniaasoqarnissaa pisariaqarpoq. Vicepolitiinspektør Gideon Quist tusagassiorfinnut nalunaaruteqarluni taama ilisimatitsivoq:
- Suliami paasiniaalluni suliassat sinneruttut suli arlaqarput. Minnerunngitsumik paasissutissat pisagut qanoq atanerinut paasiniaanissat uppernarsaateqartinnissaanullu paasiniaanissat, vicepolitiinspektør Gideon Quist oqarpoq.
Tallimanngornermi 27. november 2020 unnuakkut nalunaaqutaq 01.23 kalerriutigineqarpoq niviarsiaraq toqungasoq Aasianni silami nassaarineqarsimasoq. Pisumi takunnissimasinnaasunik politiit ujaasisimapput. Arlallit saaffiginninnerisa kingorna, niviarsiaqqallu toqungasup timaata misissorneqareerneratigut angut 27-nik ukiulik sisamanngornermi 3. december tigusarineqarpoq, pasitsaanneqarlunilu ulluni 27-ni tigummigallangassanngortinneqarluni.
Pasitsaassinissamut tunngavissaqarpoq
Vicepolitiinspektør Gideon Quistip nuannaarutigaa suliami pasitsaassinissamut tunngavissaqarneq eqqartuussiviup assinganik nalilersimagaa, angut tigummigallarneqarsinnaasunngorlugu.
- Pasitsaassinissamut tunngavik Aasianni Politiit sulilluarneratigut innuttaasunillu paasissutissanik pissarsisoqarneratigut tikinneqarsinnaasimavoq.
Suliamut tunngatillugu politiit innuttaasunut qujajumapput, innuttaasut suleqataalluarnerinut:
- Sulinitsinni paasiniaanitsinnilu innuttaasut allallu ikiuunnerat paasissutissanillu tunniussinerat pingaaruteqarluinnarpoq. Qularnanngilluinnartumik ikiuunnerit paasissutissanillu tunniussinerit pissutaaqataalluinnarlutik, angutip 27-nik ukiullip ippassamiit tigummigallangassanngortinneqarnera tikissinnaasimavarput, vicepolitiinspektør Gideon Quist oqarpoq.
Suliami Aasianni Politiit, Ilulissanit, Sisimiunit Nuummiillu politiinit ikiorteqartinneqarput. Danmarkimiit pinerluttoqarsimatillugu paasiniaasartut timinillu toqungasunik misissuisartoq aamma tikissimapput.