Politiit: Anngiortumik eqqusseriaaseq inuunermik naleqarsinnaavoq
Inut ikiaroornartumik iisillutik anngiortumik eqqussisartut innarluuteqalersinnaapput, ajornerpaamillu pisoqassappat inuunerminnut ulorianartorsiortitsisumik ajoqusersinnaallutik, politiinit oqaatigineqarpoq.
Politiit ikiaroornartumik iiseriarluni anngiortumik eqqussisoqartarnera sakkortunerpaamik mianersoqqussutigaat. Tamannami ulorianarluinnartuusoq, oqaatigineqarpoq:
- Kalaallit Nunaanni Politiit ikiaroornartumik iiseriarlutik anngiortumik eqqussiniartunik tigusaqakkajupput.
- Amerlasuutigut ajornartorsiortoqalersarpoq, ajornerpaamilu pisoqassappat inuuneq ulorianartorsiortinneqalersinnaavoq innarluuteqalertoqarsinnaalluniluunniit, taamaammat Politiinit sakkortunerpaamik tamatumunnga mianersoqqusivugut, Kalaallit Nunaanni Politiineersoq Malik Olesen tusagassiorfinnut nalunaaruteqarnermi allappoq.
Pigaartut pisortaata erseqqissaassutigaa, ikiaroornartumik anngortumik eqqussuisarneq inatsisinik unioqqutitsinerujuaannartoq:
- Ajornerpaamik kinguneqarsinnaasoq
- Ikiaroornartumilli iiseriarluni anngiortumik eqqussisarneq sianiilliornerujussuuvoq, inunnut ataasiakkaanut ajornerpaamik kinguneqarsinnaasoq. Ilaquttat, ikinngtit allalluunniit taamatut anngiortumik eqqussisimasunik nalunngisaqarunik qinnuigineqarput, anngiortumik eqqussinissamik pilersaaruteqartunut, tamatuma ulorianartuuneranik ajorluinnartumillu kinguneqarsinnaaneranik oqaluuteqqullugit, pigaartut pisortaat kaammattuivoq.
Angut ataaseq qanittukkut hashimik 300 grammiusumik nassataqartoq Kangerlussuarmi tigusarineqarpoq. Angutip tamatuma kingorna nassuerutigisimavaa, hashi 200 grammi puussiaaqqanut poortorneqarsimasoq iisimallugu.