Politiit: Arnaq biilertumit aporneqartoq
Arnaq Nuup immikkoortortaani Nuussuarmi biilertumit aporneqarsimasoq ambulancemit napparsimaviliaanneqartariaqarsimavoq.
Tallimanngornerup arfininngornerullu unnuaani 04:49 politiinut nalunaarutiginnittoqarpoq Nuup immikkoortortaani Nuussuarmi Qassuserfimmi arnaq biilertumit aporneqarsimammat. Politiit ambulancelu pisoqarfimmut sukkasuumik apuupput arnarlu ambulancemit napparsimaviliaanneqarpoq ajoqusersimaneri misissorneqassammata.
- Suliaq taanna suli naammassinngilaq, kisianni naatsorsuutigaara arnaq aporneqarnermini timimigut annertuumik ajoqusersimassanngitsoq, taamaattoqarsimagaluarpammi napparsimavimmiit politiinut saaffiginnittoqaqqissimassagaluarmat, Politiit nakkutilliisuutitaasa pisortaat Ole Hald Sermitsiaq.AG-mut oqaluttuarpoq.
Aalakoorluni allagartaqaranilu biilertoq
Pisoq alla, sapaatip ullaassaani nalunaaqutaq 03:12 politiinut nalunaarutiginnittoqarpoq aalakoornartumik imersimalluni biilertoqartoq, taanna aamma Nuummi pivoq. Ingerlaannaq politiit ornigupput perianngitsorlu Sanamut aqqummi biilertoq unitsillugu.
- Nalunaarutiginnittoqarneraniit sivitsorianngitsoq biilertoq politiinit unitsinneqarpoq. Unitsinneqarmallu paasinarsivoq taanna imigassartorsimalluni aalakoortoq aamma paasinarsivoq biilernermut allagartaqanngitsoq. Taanna alakoorluni biilersimasutut aammalu biilernermut allagartaqarnani biilersimasutut unnerluutigineqassaaq.
Angut inuusuttoq politiit sulineranni akornusersuisoq
Politiit toqqissisimatitsiniarlutik aqqusinermi angalaartuannut angut inuusuttoq politiinit malugeqqulluni unissaavoq Nuup illoqarfiata qeqqani sapaatip ullaassaani nalunaaqutaq 04:20.
- Politiit toqqissisimatitsiniarlutik aqqusinermi angalaartuinut illoqarfiup qiterpasissuatigut ingerlasunut angut taanna unissaasutut pissusilersorpoq, politiit unipput ingerlaannarli paasivaat angut inuusuttoq ikioqqulluni unissaanngitsoq, taassumami oqaasipiluutigaluni qiterlini politiinut nittarsaappaa siorasaarisutullu pissusilersorfigalugit politiit nilliaffigivai, taannaannaanngilarli, tassami taassuma inuusuttup politiit eqqissisaaniarsarigaluartut annersarniarsarivai, tamanna inerneqarpoq angutip inuusuttup tigusaaneranik aammalu isertitsivimmi aalakoorunnaarsarlugu tigummineqarneranik, politiit nakkutillisuutitaasa pisortaat Ole Hald oqaluttuarpoq.
Angut inuusuttoq taanna suli politiinit tigummineqarpoq, sapaammi kingusinnerusukkut iperagaassaaq, taamaattorli aamma unnerluutigineqassaaq atorfillit sulineranni akornusersuisutut aammalu taakkununnga nakuuserniarsimasutut.
Politiit nakkutilliisuutitaasa pisortaat Ole Hald naggataatigut oqaluttuarpoq sinerissap sinnerani imigassartorsimanermik pissutilimmik suliaqartoqallattaarsimagaluartoq, taamaattoq eqqissisimasoqarnerusimasoq.