Politiit: Arnaq pinerluttuliorfigineqarsimanngilaq
Pingasunngormat arnaq kalaaliusorineqartoq Aalborgip eqqaani toqungasoq nassaarineqarpoq. Arnap qanoq toqusimanersoq paasineqanngilaq, kisianni pinerluffigineqarsimanngilaq.
Arnaq 60-t sinnerlugit ukiulik, danskit nalunaaqutaat malillugu pingasunngornermi ullaap tungaani Aalborg Østimi toqungasoq nassaarineqartoq pinerluffigineqarsimanngilaq.
Nordjyllands Politi tusagassiuutinut nalunaarummi taama ilisimatitsipput.
Arnaq pingasunngornermi ullaap tungaani eqqaavilerisut suliffeqarfiata Reno-Nordip nalaani toqungasoq siumorneqarpoq, politiillu arnap kalaaleq pineqartoq ilimagaat.
Arnaq kinaassusersiniarlugu aamma pinerluffigineqarsimanersoq, politiit pingasunngornermi paasiniarlugu sulipput.
Arnaq 60-it sinnerlugit ukioqartuusoq Aalborgimut atassueqartoq pineqartoq, politiit unnukkut tusagassiuutinut nalunaarummi ilisimatitsissutigaat. Arnaq kalaaliunersoq Sermitsiaq.AG-p Nordjyllands Politiinut paasiniaraluarpaa, kisianni paasissutissat piffissami tassani politiit tunniussinnaasimanngilaat.
Toqqutigisaa utaqqineqartoq
Ullup ingerlanerani politiit, pinerluttulerinermik paasiniaasartut toqusunillu misissuisartut nassaarineqarfiani aamma Nørresundbymi najugaqarfimmi sulipput.
Tamanna tunuliaqutigalugu arnap pinerluffigineqarsimannginnera, politiit naqissuserpaat.
- Toqusunik misissuisartunit akissutissaq, toquneranut suna pissutaanersoq naqissuserneqarnissaanut utaqqivarput, politikommissær Carsten Straszek tusagassiuutinut nalunaarummi oqarpoq.
- Kisianni oqaatigeriikkattut, arnap alianartumik toqusimanerani pinerluttuliortoqarsimarpasinngilaq.
Arnap toqusup ilaqutai nalunaarfigineqarsimapput.