Politiit ikinnerusunit naammagittaalliuutigineqartut
Politiit suliaat pillugit naammagittaalliortarfik 2006-imi politiit pillugit naammagittaalliuutinik 20-nik tigusaqarpoq. Taamaalillunilu naammagittaalliuutit ukiut aappassaa ikileriaqqipput.
2005-imi naammagittaalliortarfik suliassanik 25-nik tigusaqarpoq 2004-milu suliassat 31-upput.
Tamannali ilutigalugu naammagittaalliortarfimmit nalunaarusiami oqaatigineqarpoq, suliassat amerlassusaat – innuttaasut amerlassusaannut sanilliullugit – Danmarkimut naleqqiullugit suli marloriaat sinnerlugit amerlanerusut.
2006-imi naammagittaalliortarfik suliassanut politiit tigummissaannut tunngasunik tigusaqanngilaq tamannalu ilorraap tungaanut ingerlaneruvoq, naammagittaalliortarfimmit oqaatigineqarpoq.
Politiit pissusilersuutaat pillugit naammagittaalliuutit amerliallassimapput tamannali ilutigalugu naammagittaalliortarfimmit oqaatigineqarpoq, pisuni tamakkunani politiit pissusilersuutaasa ajusaarutiginissaannut taamaallaat tunngavissaqartarsimasoq, massa naammagittaalliuutit sinneri tunngavissaqanngitsutut itigartitsissutigineqarsimasut.