Politiit ilisimannittunik ujaasipput: Nanortalimmi 18. februar unnuaani imerniartarfimmiissimavit?
Nanortalimmi Hotel Kap Farvel imerniartarfiani sapaatikkut 18. februar ullaassaani isersimavit? Inuit Nanortalimmi ulloq sapaatikkut 18. februar ullaassani nal. 00.00 missaaniik ullaassakkut 04.00 tungaanut imerniartarfimmiissimasut politiit attavigerusuppaat.
Inuit Nanortalimmi Hotel Kap Farvelip imerniartarfiani sapaammi ullaassakkut 18. februar isersimasimasut, eqqaaniissimasulluunniit politiinit oqaloqatigineqarumapput.
Sapaammi 18. februar arnaq 65-inik ukiulik Nanortalimmi silami toqungasoq nassaarineqarpoq. Paasiniaanermut atatillugu angut 27-inik ukiulik politiit tigusarineqarpoq, toqutsisutut unnerluunneqarluni, 27. martsillu tungaanut tigummigallarneqartussanngortinneqarluni.
Paasiniaanermut atatillugu inuit pisumut ilisimasaqarsinnaasut politiit attavigiumavaat.
Danmarkimiit ikiorneqartut
- Hotel Kap Farvelip imerniartarfiani arfininngornermi unnuap qeqqaniit, sapaammi ullaassakkut nal. 04.00 matulernerata tungaanut isersimasimavit - imaluunniit pisumut arlaatigut ilisimasaqarpit - taava politiinut oqarasuaat 701448-mut saaffiginneqquneqarput, politiit allapput.
Suliaq politiit suli paasiniarpaat. Tamassumunngalu atatillugu innuttaasut arlallit killisiorneqareersimapput. Politiit ilisimatitsipput takunnissimasinnaasut arlaqartut saaffiginnereersimasut, sulili amerlanerusut saaffiginninnissaat pisariaqartinneqartoq.
National Kriminalteknisk Center aamma Retsmedicinsk Institutimeersut sapaatip akunnerata siuliani Nanortalimmiipput, Kalaallit Nunaata Politiivi paasiniaanermi suleqatigalugit.