Politiit illoqarfiup qeqqani hashimik tuniniaaneq unitsikkusuppaat
Nuummi politiit illoqarfiup qeqqani hashimik tuniniaaneq unitsinniarlugu annertuumik iliuuseqarput.
Illoqarfiup qeqqani niuertarfiillu silataanni takussaasumik hashimik tuniniaasoqartartoq arlalinnit saaffiginnissutigineqareersorlu politiit aaqqissuussamik illoqarfiup qeqqani hashimik tuniniaaneq piffissami sivisuumi ingerlasimasoq unitsinniarlugu iliuuseqarput.
Tamanna maannamut inuit arfineq pingasut hashimik tuniniaanertik peqqutigalugu unnerluutigineqarnerannik kinguneqarpoq, pingasullu hashimik pisiniarnerminnut unnerluutigineqarlutik.
Pisinerminnut unnerluutigineqarlutillu akiliisitaanermik saniatigut pisisut hashimik arsaarneqarput.
Tuniniaasut aamma katillugit hashimik 8 gramminik 5.200 kroninillu tuniniaanermut tunngassuteqartunik arsaarneqarput.
Illoqarfiup qeqqani tuniniaaneq takussaasumik ingerlanneqartoq unitsinniarlugu suli suliniuteqartoqarallassaaq.