Politiit inatsisit malikkuminaatsippaat
Kalaallit Nunaanni politiit amerlanerparujussuit Danmarkimi politeeqarfinni politiininngarnit inatsisinik unioqqutitsisarput, taamatut allappoq Nyhedsavisen.
Siorna kalaallit politiit 12-it pissusissanik malinnaannginnertik pissutigalugu pillarneqarsimapput. Kalaallit Nunaanni politiit aalajangersimasumik atorfillit 108-aammata politiit qulingiluarterutaasa inatsisit unioqqutittarsimavaat. Naalagaaffeqatigiinni sumiiffinni allani politiit 145-issaat pissusissanik malinnaasarsimanngillat.
Kalaallit Nunaanni pissusissanik malinnaannginnermut tunngassutillit tassaasarsimapput imigassamik atornerluineq, persuttaaneq, aserorterineq sulinngitsoortarnerillu, tamanna takuneqarsinnaavoq Rigspoltiit 2006-imi pissusissanik malinnaannginnermik naatsorsugaanni. Pillaanerillu tassaasarput mianersoqqusinerniit akiliisitsinermut soraarsitsinernullu.
Kalaallit Nunaanni Politiit Peqatigiiffianni siulittaasup Aqqaluk Petersenip Nyhedsavisimut nassuerutigaa, kalaallit politiit suliassani namminerminnut tunngasuni nuanninngitsumik siuttuusut. Tamannali peqatigalugu erseqqissarpaa politiit qallunaat nunaanni politeeqatiminninngarnit annertunerujussuarmik tatineqartartut. Kalaallit Nunaanni persuttaanermik suliassat, kinguaassiuutitigut atornerluinermik suliassat imminortarnerillu naalagaaffiup sinneranit amerlanerujussuupput.
Kalaallit Nunaanni Politiit naalagaaffeqatigiit sinneraninngarnit sivisuumik pissusissanik malinnaannginnermut suliassanik amerlanernik suliassaqartitsisarsimapput.