Politiit kommunilu anorersuarnissaanut mianersoqqusisut
Kitaata sineriaata ilaani sisamanngornermi anorersuannguuttartumik natsimanissaa aarlerisaarutigineqarpoq. Kommunimit umiatsiat kivisinnaanerat mianersoqqutigineqarpoq.
![Politiit kommunilu anorersuarnissaanut mianersoqqusisut](https://image.sermitsiaq.ag/161857.webp?imageId=161857&width=960&height=512&format=jpg)
Takuuk: Ilanngutassiaq Kommuneqarfik Sermersuumit ilisimatitsissummik ilanngussinikkut nutarterneqarpoq.
Sisamanngornermi anorersuarnissaa aarlerisaarutigineqarpoq, tamatumalu malitsigisaanik politiit suliffeqarfinnut innuttaasunullu kaammattuuteqarput:
- Kalaallit Nunaata Politiivisa Nunatta Kitaani suliffeqarfiit qinnuigissavaat sanaartorfimminni eqqaannilu isumannaarsueqqullugit. Atortut teqqaattut inunnut illuutinullu navianarsinnaapput. Aammattaaq innuttaasut anorersuarmut pigisaminnik isumannaarsueqquneqarput, Kalaallit Nunaanni Politiit Facebookikkut allapput.
Taamatut nalunaaruteqarnermut pissutaavoq, DMI-mit nalunaarutigineqarmat sisamanngornermi anorersuannguuttartumik natsimaniartoq.
37 m/sekundimik anoraasuasassasoq
Nuummi silassaq misissutaaraanni takuneqarsinnaavoq, sisamanngornermi ullaakkut qulingiluat missaanni 28 m/sikundinik anorersuassasoq, 37,3 m/sekundinik anoraasuasarluni.
Kujasik-kangisimmik anorlissaaq nittaallertarlunilu:
- Sakkortuumik anoraasuartarnissaata saniatigut annertuumik nittaassanngatinneqarlunilu persorisassangatinneqarpoq, taamaalilluni Nunatta Kitaata Kujataatalu annersaa nittaattalimmik anorersuassangatinneqarput, politiit allapput.
Også Kommuneqarfik Sermersooq aamma innuttaasut pigisaminnik qajannaarsueqquneqarput:
- Pigisat tamarmik aalajangerneqartariaqarput, grilleriviuppata, trampoliiniuppata, naasuusiviuppata imaluunniit pigisat tingitaasinnaasut suulluunniit. Pigisat aalangersorneratigut imaluunniit eqqunnerasut pigisatit sumut tamaanga teqqannginnissaat qulakkiissavat, taamaasilluni innuttaasunut allanut ajoqutaassanngillat imaluunniit ulorianartorsiutitsissanngillat, kommuni nittartakkamigut allappoq.
Umiatsiaatilinnut mianersoqqussut: Angallatit kivisimasut takusarpavut
Kommunimit umiatsiaatillit immikkut ukkatarineqarput, taakku kaammattorneqarput anorersualinnginnerani umiatsiatik puttasumiittut pituttulluassagaat.
- Kommunip puttasuutaani tulanngasinnaasut sinnerlugit tulanngasoqarpoq, taamaattoqarneratalu kingunerikkajuttarpaa anorersuarsimatillugu angallatit kivisimasut Sanarfinermut Avatangiisinullu Ingerlatsivimmiit siumorneqartarneri, kommunimit oqaatigineqarpoq.