Politiit meeqqat uninngasut pillugit: Suliami paasiniaasariaqarnerluta nalilersorparput
Kalaallit Nunaata Politiivi ullumi nalilersussavaat meeqqat pingasut meeqqerivimmi ataasinngornermi eqqiaanermut qaqorsaammik imertinneqartoorsimanerat paasiniaaffigissanerlugu.
Meeqqat pingasut ataasinngornermi sulisunit eqqiaassutissamik imertinneqartoorsimasut politiinit misissuiffigineqassanersut Kalaallit Nunaata Politiivisa ullaap tungaani nalilersussavaat.
Meeqqat pingasut angajoqqaavi kommunimit ilisimatinneqarsimapput sulisuni kukkusoqartoorneranit meeqqat eqqiaassutissamik imertinneqarsimasut.
Meeqqat pingasut taakku sisamanik, tallimanik arfinilinnillu ukiullit Sisimiuni peqqissaavimmi uninngatinneqarsimapput nakkutigineqarlutik.
- Suliaq misissussavarput. Pinerluttoqarsimanersoq ilisimanngilarput, ilimagaarpullu kukkusoqarsimanerani taama pisoqarsimassasoq. Kisiannili nalilersussavarput suliap paasiniaaffiginissaa pisariaqarnersoq, Kalaallit Nunaanni Politiini pigaartut pisortaat Mark Larsen Sermitsiaq.AG-mut oqarpoq.
Angajoqqaat naapertorlugit meeqqat taakku pingasut ajunngillat. Ajutoorneq pivoq meeqqerivimmi imeqanngimmat erngup aqqutai qerisimammata, sulisullu dunkit imermik imallit eqqiaassumillu erruinermut qaqorsaammik imerpalasumik imallit parlaassisoorsimammata.